УЛС ТӨРИЙН НАМУУД БОЛОН ОЛОН НИЙТИЙН БАЙГУУЛЛАГУУДАД САНАЛ ХҮРГҮҮЛЭХ ТУХАЙ
Монгол Улсын Ерөнхийлөгч Ц.Элбэгдорж мөрийн хөтөлбөр болон бодлого, үйл ажиллагааны хөтөлбөртөө “Орон нутгийн хөгжлийг дэмжигч Ерөнхийлөгч байна”, “Орон нутгаас хуулиар булаан авсан эрхийг хуулиар буцаан олгоно”, “Байгальд ээлтэй, орон нутгийг дэмжсэн эдийн засгийн тогтвортой хөгжлийн бодлогыг дэмжинэ” гэсэн зорилтуудыг дэвшүүлэн ажиллаж байгаа билээ.
Өнгөрсөн оны 12 дугаар сард “Төсвийн тухай хууль”-д орон нутгийн эрх мэдлийг төсвөөр дамжуулан нэмэгдүүлэх, төсвийн зарцуулалт, хяналт, шийдвэр гаргах түвшинд иргэдийн оролцоог нэмэгдүүлэх, орон нутгийн хөгжлийн санг бий болгох талаар Монгол Улсын Ерөнхийлөгчийн дэвшүүлсэн дээрх зорилтууд тусгалаа олсон юм.
Монгол Улсын Үндсэн хуулийн Гуравдугаар зүйлийн “Монголын ард түмэн төрийн үйл хэрэгт шууд оролцож, мөн сонгож байгуулсан төрийн эрх барих төлөөлөгчдийн байгууллагаараа уламжлан энэхүү эрхээ эдэлнэ” гэсэн заалт, Төсвийн тухай шинэ хуульд тусгагдсан үзэл санааг бодит ажил хэрэг болгохын тулд “Шууд ардчилал, иргэдийн оролцоогоор дамжуулан төвлөрлийг сааруулах үндэсний дунд болон урт хугацааны бодлогын баримт бичиг” батлах тухай Монгол Улсын Ерөнхийлөгчийн зарлигийг гаргаад байна.
Төвлөрлийг сааруулах, шийдвэр гаргах бүхий л түвшинд иргэдийн оролцоог нэмэгдүүлэх, төлөөллийн ардчиллаас шууд ардчиллын үндэсний тогтолцоог бүрдүүлэх ажлыг эхлүүлэх үүднээс Төрийн тэргүүний санаачилгаар “Шууд ардчилал” иргэдийн оролцоотой төсвийн менежментийн үндэсний хэмжээний сургалтыг Улаанбаатар хотын 9 дүүргийн бүх хороодын 1000 гаруй иргэдийн төлөөлөл, 21 аймгийн бүх сумдын 1200 орчим иргэдийн төлөөллийг хамруулан 2 үе шаттайгаар Төрийн ордонд зохион байгууллаа. Энэхүү сургалтанд хамрагдсан нийт иргэдэд “Шууд ардчилал”-ын багшийн анхны гэрчилгээг гардуулсан.
Сургалтанд хамрагдсан “Шууд ардчилал”-ын анхны багш нар ард иргэд өөрсдийн шууд оролцоотойгоор орон нутгийн түвшинд шийдвэр гаргах, төрийн шийдвэр гаргах үйл ажиллагаанд тогтсон дүрэм, журмын дагуу оролцох, хянах,орон нутгийн төсвийн төлөвлөлт, гүйцэтгэлд иргэдийн оролцоог нэмэгдүүлэх зэрэг олон сэдвээр орон даяар сургалт явуулахаар төлөвлөж байгаа тул энэ чиглэлээр хамтарч ажиллах саналыг Та бүхэнд хүргүүлж байна.
МОНГОЛ УЛСЫН ЕРӨНХИЙЛӨГЧИЙН ТАМГЫН ГАЗРЫН ДАРГА П.ЦАГААН
УЛС ТӨРИЙН НАМУУД БОЛОН ОЛОН НИЙТИЙН БАЙГУУЛЛАГУУДАД САНАЛ ХҮРГҮҮЛЭХ ТУХАЙ
