Монгол Улсын Ерөнхийлөгч Ц.Элбэгдорж Лаосын Ерөнхийлөгч Чуммали Саянасонтой уулзлаа
АСЕМ-ын дээд хэмжээний уулзалтад оролцсон Монгол Улсын Ерөнхийлөгч Ц.Элбэгдорж Бүгд Найрамдах Ардчилсан Лаос Ард Улсын Ерөнхийлөгч Чуммали Саянасонтой эх орондоо буцахынхаа өмнө уулзлаа.
Лаосын Ерөнхийлөгч хэлэхдээ “Монгол, Лаос хоёр хол хэдий ч сэтгэлээрээ ойр улс. Та бидний энэ уулзалт хоёр орны харилцааг хөгжүүлэхэд чухал ач холбогдолтой байх болно гэж үзэж байна. Олон улсын тавцанд ч манай хоёр орон бие биеэ дэмжиж ирсэн. Харин эдийн засгийн хамтын ажиллагаанд анхаарах шаардлагатай байгаа. Монгол Улс олон улсын тавцанд өндөр нэр хүндтэй болж байгаад сайхан сэтгэгдэлтэй байна. Лаос улсын улс төр, эдийн засаг тогтворжиж, ард түмний амьдрал сайжирч байна. Ядуурлыг 2015 он гэхэд арван хувь болтол бууруулах зорилт тавин ажиллаж байгаа. Олон жилийн дайны уршгийг арилгахад ихээхэн бэрхшээл учирч байна. Гэхдээ ойрын жилүүдэд тодруулбал 2018 он гэхэд хөдөө аж ахуйн орноос аж үйлдвэр, хөдөө аж ахуйн орон болох зорилт тавьсан. Олон улсын эдийн засгийн хямрал их нөлөөлөхгүй бол зорилт маань хэрэгжинэ гэж бодож байна. Эдийн засгийн өсөлтийг жилд найман хувиар тогтвортой байлгахыг хичээж байна” гэв.
Монгол Улсын Ерөнхийлөгч Ц.Элбэгдорж АСЕМ-ын уулзалтыг сайн зохион байгуулсанд оролцогч улс орны төр, засгийн тэргүүнүүд сэтгэл ханамжтай байгааг дуулгаад Дэлхийн худалдааны байгууллагад Лаос улс элсэнд баяр хүргэлээ. Мөн хоёр орон өнгөрсөн есдүгээр сард дипломат харилцаа тогтоосны ойгоо ёслол төгөлдөр тэмдэглэснийг дурдаж, Засгийн газар хоорондын комиссын хуралдаанаар ямар салбарт хамтран ажиллах талаар тодорхой ярилцаж үр дүнд хүрнэ гэдэгт итгэж буйгаа хэлэв. Ерөнхийлөгч “Өмнө нь хөдөө аж ахуй, газар тариалангийн салбарт хамтран ажиллахаар тохиролцсонд баяртай байна. Манай хоёр орон далайд гарцгүй. Тиймээс энэ асуудлаар бие биеэ дэмжиж ажилладаг. НҮБ-ын түвшинд ч хамтран ажиллах боломж бий. Миний хувьд АСЕМ-ын дээд хэмжээний уулзалтад оролцоод өндөр сэтгэгдэлтэй буцах гэж байна. Лаосын ард түмэнд аз жаргал, сайн сайхныг хүсэн ерөөе. Ерөнхийлөгч таныг тааламжтай цагтаа Монголд айлчлахыг урьж байна” гэлээ.
Танай сайхан оронд хоёр дахиа айлчлах боломж гарвал таатай байх болно. Таныг ч гэсэн Лаос улсад айлчлахыг урьж байна. Энэ удаа та олон улсын хуралд оролцоод буцлаа. Манай хоёр орны Засгийн газар харилцан өгөөжтэй хамтран ажиллана гэдэгт итгэж байна гэж Ерөнхийлөгч Чуммали Саянасон хэлэв.
Мэдээний дүрс хавсаргав
http://share.gogo.mn/IbOxo1T7Cg69751352241187/2012-11-6%20laosiin%20eronhiilogch%20tei%20uulzaw.wmv
Монгол Улсын Ерөнхийлөгч Ц.Элбэгдорж Лаосын Ерөнхийлөгч Чуммали Саянасонтой уулзлаа
