“Монгол бахархлын өдөр”-ийг тохиолдуулан Монгол Улсын Ерөнхий сайд Норовын Алтанхуягийн хэлсэн үг
Эрхэм хүндэт Монгол Улсын Ерөнхийлөгч,
Улсын Их Хурлын дарга,
энд хуран цугласан зочид төлөөлөгч, ноёд хатагтай нар аа.
Та бүхэнд Их Монгол улсыг үндэслэн байгуулагч, өнгөрөгч мянганы хүн Их Эзэн Богд Чингис хааны мэлмий гийсний 850 жилийн ойн баярын өдрийн мэнд хүргэе.
Монгол хүн бүр эх орон, ард түмэн, эзэн хаан, түүх шастираараа бахархах өдөртэй болно гэдэг зорих зорилго, хүсэх тэмүүлэл, зүтгэх хүчтэй болж байгаагаас ялгаагүй билээ.
Шинэчлэлийн Засгийн газраас Монгол Бахархалын өдрийг тохиолдуулан ард түмнийхээ бахархал омогшилийг төрүүлэх, иргэний үүргээ ухамсарлах, өв соёлтойгоо танилцах, эх түүхийнхээ талаарх эрдэм мэдлэгээ солилцох, үндэсний урлагаа шимтэх гээд олон арван ач холбогдолтой ажлуудыг гурван өдрийн турш зохион байгуулж байна.
Хамгийн анхны ажил маань 11 дүгээр сарын 12-ны өдөр 850 залуус иргэний андгай тангараг өргөх ёслол байлаа. Энэ жил Монголчууд бид Эзэн Чингис хааныхаа төрсөн өдрийг тэмдэглэх санаачлагыг хуулиндаа оруулж, энэ өдрийг бүх нийтийн амралтын өдөр болгон хуульчилсан. Тиймээс Эзэн Чингис хаанаас эхтэй тусгаар тогтносон бүрэн эрхт Монгол улсын иргэн болсоноо Монгол залуус маань бахархал хэмээн үзэж иргэний андгай өргөн иргэний үнэмлэхээ гардаж авсан билээ.
Хоёр дахь өдөр буюу 11 дүгээр сарын 13-ны өдөр Их эзэн Чингис хааны 850 жилийн ойд зориулсан үзэсгэлэнг Үндэсний түүхийн музейд зохион байгууллаа. Уг үзэсгэлэнд ирсэн хүн бүхэн Чингисийн Монгол дан ганц байлдаж дайтаж яваагүй бөгөөд соёлын өвийг таригч, техник технолгийг хөгжүүлэгч, чөлөөт худалдааг дэмжигч, даяарчлалыг санаачлагч гээд хүн төрөлхтөний түүхэнд олон арван үнэтэй хувь нэмэр оруулсан гэдгийг мэдрэх болно.
Харин 11 дүгээр сарын 14-ний өдөр буюу өнөөдөр Олон улсын эрдэм шинжилгээний бага хурлыг “Чингис хаан ба даяарчлал” гэсэн сэдвийн хүрээнд зохион байгуулж байна. Уг хурлаар Дэлхийд нэрээ дуурсгасан Чингис хааныхаа монгол болон дэлхийн түүхэнд гүйцэтгэсэн үүрэг, үйл ажиллагааг бодит үнэний шалгуураар шүүн тунгааж, гүтгэгдэн гуйвагдсаныг нь залруулж, алдаж оносныг нь үнэнээр бичиж, амжилтын түүхээс нь санаа авахад орших бөгөөд дэвшилтэт сайныг нь дууриал болгон уламжлан хөгжүүлж, бид их түүхтэй ард түмэн гэдгээ зөвөөр ойлгуулах нь үндсэрхэг үзэл бус үндэсний бахархалын илэрхийлэл юм.
Мөн өнөөдөр Чингис хааны хөшөөнд хүндэтгэл үзүүлэх, ойд зориулсан “Монгол туургатан” хүндэтгэлийн тоглолтыг ч бас зохион байгуулах юм.
Аливаа шинэчлэлийг явуулна гэдэг өнгөрсөнөө умартана гэсэн үг огт биш ээ. Харин мартаж боломгүй өв соёлоо хайрлан хамгаалж хадгалан үлдээх шаардлагатай. Тиймээс ч манай Засгийн газар Шинэчлэлийн бодлогодоо энэ бүгдийг онцгойлон тусгасан.
Эзэн Чингисийн удам, Элэг нэгт ахан дүүсээ! Өнөөдөр бид өвөг дээдсийнхээ үлдээсэн агуу түүхээр бахархаж сууна. Тэд бидэнд ийнхүү бахархах их түүхийг үлдээсэн шиг ирээдүй хойч минь биднээр бахархах тэр түүхийг хамтдаа бүтээцгээе.
Сайн үйлс дэлгэрэх болтугай
Анхаарал тавьсанд баярлалаа
“Монгол бахархлын өдөр”-ийг тохиолдуулан Монгол Улсын Ерөнхий сайд Норовын Алтанхуягийн хэлсэн үг
