Монгол Улсын Ерөнхийлөгч Цахиагийн Элбэгдоржийг Олон Улсын Олимпийн Хорооны “Тогтвортой хөгжил ба спорт” цомоор шагналаа
Монгол Улсын Ерөнхийлөгч Ц.Элбэгдоржид Олон Улсын Олимпийн Хороо /ОУОХ/-ны жинхэнэ гишүүн Ш.Магван, Монголын Үндэсний олимпийн хороо /МҮОХ/-ны ерөнхийлөгч Д.Загдсүрэн нар өнөөдөр бараалхаж, Олон Улсын Олимпийн Хорооны ерөнхийлөгч Жак Роггээс илгээсэн “ Тогтвортой хөгжил ба спорт” цом болон батламжийг гардуулан өглөө.
ОУОХ-ны жинхэнэ гишүүн Ш.Магван хэлэхдээ “Олон Улсын Олимпийн Хороо спортод гарамгай хувь нэмэр оруулсан улс төрийн зүтгэлтэнд олгодог “Тогтвортой хөгжил ба спорт” гэсэн нэр хүндтэй цомыг өөрийн биеэр Монгол Улсын Ерөнхийлөгч танд гардуулж өгөх хүндтэй үүргийг биелүүлж байгаадаа баяртай байна “ гэв.
МҮОХ-ны ерөнхийлөгч Д.Загдсүрэн хэлэхдээ “Монгол Улс нийгмийн тогтвортой байдлыг ханган спортын хөгжилд анхаарснаар тамирчдын амжилт өсөж байгааг хамгийн сүүлд болсон “Лондон-2012” зуны олимпийн 30 дугаар наадамд Монголын баг түүхэндээ хамгийн олон буюу 5 медаль хүртсэн явдал харуулсныг Олон Улсын Олимпийн Хороо онцолж байна. Мөн Ерөнхийлөгч Та Монгол Улсын Ерөнхий сайд байхдаа анх удаа спортод амжилт гаргасан тамирчдад олгох мөнгөн шагналыг бий болгож байсныг Монголын ард түмэн, спортод элэгтэй хүн бүхэн тодоос тод санаж байгаа. Түүнчлэн Ерөнхийлөгч болсныхоо дараахан тамирчидтай “Зангиагүй уулзалт” зохион байгуулж, улмаар 2012 оны 8 дугаар сарын 16-ны өдөр гаргасан 151 дүгээр зарлигаараа “Олимпийн хөтөлбөрт багтдаг спортын төрлүүдээр Олимпийн наадам болон Дэлхийн аварга шалгаруулах тэмцээнээс медаль хүртсэн бүх үеийн тамирчдад сар тутам насан туршид нь мөнгөн тэтгэлэг олгохоор болсон нь” Монголын спортын салбарын түүхэнд тодоор үлдэх шийдвэр гэж дүгнэж байгаа. Тус зарлигийг Монголын бүх аймаг, хот, дүүргийн удирдлагад гардуулснаас гадна нийт ард түмэнд таниулах, түгээх аяныг Өвөрхангай, Өмнөговь, Дорнод, Хэнтий, Дундговь аймагтзохион байгуулсан. Монголоос олимп болон дэлхийн аваргууд олноор төрнө гэдэгт итгэж байна.Эдгээр үйл явдалтай Монгол Улсын Ерөнхийлөгч таны хувь нэмэр салшгүй холбоотой байх болно” гэж хэллээ.
Монгол Улсын Ерөнхийлөгч Ц.Элбэгдорж “Тогтвортой хөгжил ба спорт” цомыг батламжийн хамт талархан хүлээн авч, Олон Улсын Олимпийн Хороо болон Монголын Үндэсний Олимпийн Хороонд баярласнаа илэрхийлэв.
Мэдээний дүрсийг татаж авна уу
http://share.gogo.mn/CZ3pkWpfCY78561353300949/2012-11-19%20olimpiin%20shagnal.wmv
Монгол Улсын Ерөнхийлөгч Цахиагийн Элбэгдоржийг Олон Улсын Олимпийн Хорооны “Тогтвортой хөгжил ба спорт” цомоор шагналаа
