Монгол Улсын Ерөнхийлөгч Ц.Элбэгдорж зарлиг гарган Афганистан дахь АНУ-ын тэргүүлсэн “Тогтвортой эрх чөлөө”, НАТО-гийн тэргүүлсэн “Аюулгүй байдлыг дэмжих” олон улсын цэргийн ажиллагаанд үүргээ амжилттай гүйцэтгэсэн Монголын Зэвсэгт хүчний бие бүрэлдэхүүнийг “Цэргийн хүндэт медаль”, “Энхийн төлөө медаль”-иар шагнасан юм.
Уг шагналыг Ерөнхийлөгчийн Тамгын газрын дарга П.Цагаан өнөөдөр гардуулж баяр хүргэв. Цэргийн хүндэт медалиар Зэвсэгт хүчний 032 дугаар ангийн цэргийн цагдаагийн ротын захирагч, хошууч П.Ариунбат, 084 ангийн ротын захирагч, ахмад П.Дэлгэрмөрөн, 337 дугаар ангийн нисэх засварын хөдөлгүүрийн ахлах механик, сургагч ахлагч Б.Түвшинжаргал нарын 7 хүнд, Энхийн төлөө медалиар Зэвсэгт хүчний 150 дугаар ангийн ажиллагааны ахлах офицер, ахмад Д.Гантулга, 167 дугаар ангийн соёл хүмүүжлийн дарга, ахлах дэслэгч Д.Хадхүү, 119 дүгээр ангийн оператор жолооч, ахлагч Б.Амарсайхан, 124 дүгээр ангийн радиотелеграфчин, дэд ахлагч Ч.Төрбаяр нарын 180 хүнийг шагнажээ.
