Монгол Улсын Ерөнхийлөгч Ц.Элбэгдорж өнөөдөр, аймаг нийслэлийн ИТХ-ын болон Засаг дарга нарын уулзалтанд оролцож үг хэллээ. Ерөнхийлөгч хэлэхдээ:
“Аливаа ажлын үр дүн сайн байх эсэх нь мөнгөнөөс биш харин удирдлагаасаа шалтгаална гэдгийг ярианыхаа өмнө онцлон хэлье.
Миний бие Ерөнхийлөгчөөр ажиллах бүрэн эрхийн хугацаандаа таван гол бодлогыг баримталж ажиллах бөгөөд эдгээр нь
-Төр дэх иргэний оролцоо
-Хууль, шүүхийн шинэтгэл
-Орон нутгийн эрх
-Байгаль орчин
-Гадаад бодлого зэрэг болно. Энэхүү таван гол бодлогоо “Хүн-Байгал” гэсэн тулгуур зарчим дээр үндэслэн хэрэгжүүлнэ.
Удирдан ажиллаж байгаа, аймаг, хотдоо шийдвэр гаргах явцдаа иргэдийг сайн оролцуулж байгаарай, иргэнээ сонсч байгаарай гэж Та бүхэнд захья. Иргэн оролцдоггүй иргэний нийгэм гэж байх ёсгүй. Иргэнийг оролцуулсан л бол шийдвэр гаргах үйл явц илүү амар, шийдвэр нь ч илүү бодитой болдог. Нэгэнт өөрийнх нь санал шийдвэрт туссан бол, иргэд энэ шийдвэрийг биелүүлэхдээ илүү дуулгавартай байдаг. Төрийн ажилтны нэг шалгуур бол, иргэний эрхийг хэр зэрэг хүндэтгэж ажиллаж байна вэ бусдад хэр зэрэг үлгэр жишээ байна вэ гэдгээр хэмжигдэж байх ёстой.
Аймаг орон нутаг бүрт хэдэн арван жил үе дамжин хийж ирсэн, хийж чаддаг зүйл гэж байгаа. Түүнийгээ үйлдвэрлэж, брэнд болгож, тэр чиглэлээр нь дэмжлэг үзүүлж ажиллах нь үйлдвэрлэлийг хөгжүүлж, орлогыг нэмэгдүүлэхэд тус нэмэр болох байх аа.
Бид олон жил мал сүргийн тоо толгойгоо өсгөн үржүүлж байгаа тухай бахархан ярьдаг байсан. Харин одоо хүн амаасаа 20-25 дахин ихээр өссөн мал, асуудал дагуулж эхэллээ. Бэлчээр даацгүй, усгүй, цөлжиж байна. Бас, хоёр хөршид мах экспортлох асуудал, тарифын, эрүүл ахуйн олон асуудал дагуулдаг. Бид энэ чиглэлээр ямар бодлого барьж ажиллах ёстойг тодорхойлохын тулд манай баг ажиллаж байна. Та бүхэн саналаа өгөөрэй.
Төсөвтэй холбоотой өөрийн бодлоо хэлье. Орон нутгийн төсөвтэй холбоотой шаардлагаа Засаг дарга нар зоригтой хэлж байгаасай гэж би хүсч байна. Та бүхэн төсвийн эрхийг шаардах цаг болсон. Төвлөрсан байдлаар, төвөөс төсвийг зохицуулах шаардлагатай цаг үе байсныг үгүйсгэхгүй. Гэвч Засаг дарга нар “банкны кассчин” шиг үүрэгтэй байхаасаа татгалзах цаг болсон. Дээд эрх мэдэл хаана байна, тэнд мөнгө хуваарилдаг эрх мэдэл нь бас байгаа гэдэг буруу ойлголтыг Засгийн газар, Их хурлын түвшинд өөрчлөх хэрэгтэй байна. Угтаа бол ард түмэнд эрх мэдэл нь бий гэдгийг ойлгохгүй байна. Надтай уулзсан засаг дарга нар, тойрог бүрт хуваарилсан мөнгө өөрсдөд нь бөөн зовлон болдог талаар нэг бус удаа хэлж байсан. Аймаг, сумд өөрсдийнхөө төсвийг яаж хэрхэн зарцуулахаа хурлаараа шийддэг байвал Ерөнхий сайд , их хурлын гишүүд “багийн байшин”-гийн төлөө санаа зовоод яваад байх шаардлагагүй болох ёстой юм гэж боддог.
Эцэст нь хэлэхэд орон нутаг гэдэг бол үндсэн нутаг гэсэн үг. Үндсэн нутагт хүний үндсэн эрх хэрэгжиж, үндсэн хөрөнгө эргэлдэж байх ёстой.
Бүгдээрээ Монгол улсын хөгжлийн төлөө нэгэн сэтгэлээр ажиллая” гэлээ.
