Монгол Улсын Ерөнхийлөгчийн зарлиг бүрэн утга агуулгаараа хэрэгжиж эхэллээ
ЕТГ-ын дарга П.Цагааны тамирчдад шагнал гардуулах үеэр хэлсэн үг
Эрхэм хүндэт тамирчид, дасгалжуулагчид, спортод элэгтэй Монголчууд аа, Хоёр сая долоон зуун мянган зүрхийг Монгол хэмээх нэгэн үнхэлцэгэнд багтааж, даян дэлхийн түмэн олонд суу алдраа бадруулсан баатрууддаа Монгол Улсын Ерөнхийлөгчийн нэрийн өмнөөс болон хувиасаа чин сэтгэлийн халуун мэнд дэвшүүлье.
Хүмүүний амьдралын гол утга учрын оргил нь алдраа дуурсгаж, ард түмнийхээ өмнө мөнхийн гавьяа байгуулах явдал байдаг. Энэ нь мэдээж хүн болгонд тохиолдоод байдаг аз бишээ. Тийм ч учраас Монгол Улсын Ерөнхийлөгч 2012 дугаар оны 8 дугаар сарын 16-ны өдөр 151 тоот зарлигаараа Олимпийн наадам, Паралимп, олимпийн наадмын төрлийн зай, жинд багтдаг сонирхогчдын спортын Дэлхийн аварга шалгаруулах тэмцээнээс медаль хүртсэн Монгол Улсын иргэнд насан туршид нь мөнгөн урамшуулал олгох чиглэлийг Засгийн газарт үүрэг болгосон билээ.
Монголчуудын итгэл, сэтгэлийн сонголтоор байгуулагдсан шинэчлэлийн Засгийн газар ч цаг алдалгүй тогтоол шийдвэрээ гаргаснаар Ерөнхийлөгчийн зарлиг утга, уг агуулгаараа бүрэн биеллээ олж байна, энэ өдөр.
Баяртай байна.
Төр иргэдээ, тэр дундаа баатруудаа мартах ёсгүй. Утга учиртай амьдрал, хүсэл мөрөөдлийнхөө төлөө, хувийн жаргалыг хойш нь тавьж зон олныхоо төлөө хүч хөдөлмөрөө зориулсан хэн бүхнийг зөвхөн спортынхон гэлтгүй урамшуулан хөхиүлэх нь манай төрийн ариун үүрэг.
Энэ шагнал урамшуулал Монголын ирээдүй үед өгч байгаа итгэл найдварын гал юм. Та бүхэн хөлс хөдөлмөр, байгуулсан гавьяагаараа Монголчуудаа баярлуулсан. Замбуулингийн тэнгэрт түг түмэн од гялалздаг. Даян дэлхийн зон олонд хүлээн зөвшөөрөгдсөн жинхэнэ одод гэмээнэ та нар билээ. Хүн бүхэн алдартай тамирчин болох албагүй ч эрүүл чийрэг байх нь эрхэм зорилго.
Энэ ч утгаараа тамирчид та бүхэн эрүүл монголын төлөөх үлгэр жишээний гол баатрууд. Та бүхний хийсэн, бүтээсэн бүхнийг төр үнэллээ. Цаашид ард түмэнтэйгээ хамтран хийж бүтээхийн итгэл найдварыг ч хамтад нь өгсөн хэмээн итгэж байна. Олимп, дэлхийн аваргууд Хөх Монголд улам “ОЛУУЛАА” төрөх болтугай.
Монгол Улсын Ерөнхийлөгчийн зарлиг бүрэн утга агуулгаараа хэрэгжиж эхэллээ
