Ерөнхийлөгчийн Тамгын газрын дарга шагнал хүртэв
МҮЭ-ийн холбооны шийдвэрээр Монгол Улсын Ерөнхийлөгчийн Тамгын газрын дарга П.Цагааныг “Хөдөлмөрийн хүний төлөө” медалиар шагналаа. Шагналыг МҮЭ-ийн холбооны дэд ерөнхийлөгч Х.Амгаланбаатар, тус холбооны ерөнхий нарийн бичгийн дарга Г.Адъяа нар гардууллаа. Ерөнхийлөгчийн Тамгын газрын дарга П.Цагаан сургууль төгсч ирээд ажлын гараагаа МҮЭ-ийн байгууллагаас эхэлж байжээ. Шагнал гардаж авах үеэрээ Ерөнхийлөгчийн Тамгын газрын дарга П.Цагаан “МҮЭ-д ажилласнаар хөдөлмөрчин, ажилчин хүн, энгийн ард иргэд яаж амьдардгийг илүү гүнзгий мэдрэхэд хэрэг болсон. Миний өдий зэрэгтэй төрд зүтгэхэд анх МҮЭ-д таван жил гаруй ажилласан явдал амьдралын арвин их туршлага, сургууль болсон.
Сайн цаг ирж байна. Улс орноо улам сайн сайхан болгохын төлөө МҮЭ, төрийн байгууллагууд хамтарч ажиллая. Энэ бол надад өгч байгаа шагнал гэхээс гадна Монгол Улсын Ерөнхийлөгчийн Тамгын газрын хамт олонд өгсөн шагнал гэж хүлээж авч байна. Их баярлалаа” гэлээ.
Энэ үеэр МҮЭ-ийн холбооны ерөнхий нарийн бичгийн дарга Г.Адъяатай товч ярилцлаа.
- МҮЭ могой жилээ ямар амжилтаар угтаж байгаа вэ?
-Юуны өмнө МҮЭ могой жилийн эхэн дээр Монголын иргэд, хөдөлмөрчдийн хөдөлмөр, нийгмийн хамгааллын төлөө үйл ажиллагаа явуулж тодорхой хувь нэмэр оруулсан төрийн болоод МҮЭ-ийн зүтгэлтнүүдээ “Хөдөлмөрийн хүний төлөө” медалиар шагнаж байна. Энэ шагналыг 1994 оноос олгож эхэлсэн. П.Цагаан бол МҮЭ-ээс ажлын гараагаа эхэлсэн. МҮЭ-ийн эрхийн тухай хуулийг анх гаргахад их хувь нэмэр оруулсан, сүүлийн үед ч МҮЭ-ийн асуудлаар байр сууриа илэрхийлж олон хууль тогтоомж, төрийн бодлогыг боловсруулахад оролцож байгаа зүтгэлтэн юм.
Ирэх могой жилд МҮЭ-ийн гол зорилт бол Эрүүл, аюулгүй ажлын байрны төлөө гэсэн үйл ажиллагааг голлоно. Монголд ажлын байрууд шинээр бий болж байна. Гэхдээ чанартай, бүтээмжтэй, аюул осолгүй ажлын байр маш чухал байна. Ажил хийж байгаа хүмүүсийн хувьд амьжиргаагаа хангахуйц, гэр бүлээ тэжээхүйц тийм цалинтай болгох шаардлагатай. Үүнд шинэ Засгийн газар, Монголын төр бүхэлдээ анхаарч нийгмийн түншлэлийн хүрээнд ажиллаж байна.
МҮЭ шинэ оны өмнө Монгол Улсын Ерөнхийлөгчийн Тамгын газартай хамтран ажиллах Санамж бичиг байгуулсан. Хөдөлмөр, нийгмийн хүрээнд гарч байгаа хууль тогтоомжуудыг боловсронгуй болгох талаар иргэдийн оролцоог төрийн бодлогод илүү өргөн болгох, төрийн бодлогод иргэдийн оролцоог өргөжүүлэх, Иргэний танхимаар дамжуулж хөдөлмөрийн харилцаатай холбоотой асуудлаар иргэд, төрийн бодлогыг холбох ажлыг хамтран явуулах зэрэг өргөн хүрээнд ажиллах Санамж бичиг байгуулаад байна” гэлээ.
Ерөнхийлөгчийн Тамгын газрын дарга шагнал хүртэв
