Уур амьсгалын өөрчлөлтийн асуудлаар болсон Өндөр хэмжээний уулзалтын 2 дахь өдрийн хэлэлцээрүүд тодорхойгүй байдалд удаан үргэлжилсний дараа, Данийн цагаар 23 цагийн үед АНУ-ын Ерөнхийлөгч Б.Обама хэвлэлийн бага хурал зарлаж, доорх мэдэгдлийг хийлээ.
Юуны өмнө АНУ, Энэтхэг, Африкийн орнууд болон Хятадтай нэгдсэн тохиролцоонд хүрч чадсан гэж онцолсон юм.
Ерөнхийлөгч Б.Обамагийн мэдэгдсэнээр, Копенгагены бага хурлаас Тунхаглал гаргахаар санал нэгтэй тохирсон бөгөөд, энэ нь улс орнуудын сайн дураараа дагаж мөрдөх баримт бичиг болох ажээ. Энэхүү тунхаглалаар, уур амьсгалын өөрчлөлтөөс үүдэх дулаарыг 2 хэмээс хэтрүүлэхгүй байхаар болжээ. Улс орон бүр, уур амьсгалын өөрчлөлтийн нөлөөллийг багасгах, хүлэмжийн хийн хэмжээг бууруулах талаар авах арга хэмжээнийхээ жагсаалтыг орон тус бүрээр хавсралтаар гаргахаар болсон байна.
“Бид хангалттай биш ч, эхний алхмаа хийлээ” гэж АНУ-ын Ерөнхийлөгч Б.Обама хэлсэн юм.
Зургаан сарын дараа, ХБНГУ-ын Бонн хотод сайд нарын түвшинд хурал зохион байгуулж, нэгэнт эхэлсэн энэ яриа хэлэлцээрийг үргэлжлүүлэх, үр дүнд хүргэх, гэрээ хэлэлцээрийн хэлбэрт оруулах талаар ХБНГУ-ын канцлер А.Меркель санал болголоо.
