Монгол Улсын Ерөнхийлөгчийн Тамгын газрын дарга П.Цагаан АНУ-ын “Америкийн Зөвлөл” олон улсын боловсролын байгууллагын төлөөлөгчдийг хүлээн авч уулзлаа
Монгол Улсын Ерөнхийлөгчийн Тамгын газрын дарга П.Цагаан АНУ-ын “Америкийн Зөвлөл” олон улсын боловсролын /American Councils for International Education/ байгууллагын ерөнхийлөгч Дэн Дэвидсон тэргүүтэй төлөөлөгчдийг өнөөдөр хүлээн авч уулзлаа.
Уулзалтын үеэр ноён Дэн Дэвидсон “Биднийг хүлээн авч уулзсан та бүхэнд талархаж байна. Монголын сэтгүүлчдийн эхний ээлж болох 14 сэтгүүлч саяхан манай сургуульд мэргэжил дээшлүүлээд ирсэнд сэтгэл хангалуун байна. Бид цаашид үйл ажиллагаагаа өргөжүүлэн, зөвхөн сэтгүүлзүй гэлтгүй өөр бусад олон салбарт хамтран ажиллах сонирхолтой байгаа” гэлээ.
АНУ-ын “Америкийн Зөвлөл” олон улсын боловсролын байгууллага болон Ерөнхийлөгчийн Тамгын газраас хамтран сэтгүүлчдийн мэргэжил дээшлүүлэх сарын хугацаатай сургалтыг зохион байгуулсан юм. Тодруулбал Монголын 14 сэтгүүлч өнгөрсөн нэгдүгээр сарын 15-аас хоёрдугаар сарын 15-нд АНУ-д амжилттай суралцаад ирсэн билээ. Сургалтын хоёр дахь ээлжийн бүртгэл дуусч, 14 сэтгүүлч ирэх дөрөвдүгээр сард АНУ-ыг зорино.
Монгол Улсын Ерөнхийлөгчийн Тамгын газрын дарга П.Цагаан АНУ-ын “Америкийн Зөвлөл” олон улсын боловсролын байгууллагын төлөөлөгчдийг хүлээн авч уулзлаа
