АОХН-ийн Сайд нарын VII бага хуралд 104 орны 1215 төлөөлөгч оролцоно
Монгол Улсад энэ дөрөвдүгээр сарын 27-29-нд Ардчилсан орнуудын хамтын нийгэмлэгийн Сайд нарын VII бага хурлыг зохион байгуулах гэж байна. Энэ талаар Гадаад харилцааны сайд Л.Болд, тусгай үүрэг гүйцэтгэгч Элчин сайд Д.Ганболд, С.Бадрал, Монгол Улсын Ерөнхийлөгчийн Тамгын газрын Олон нийттэй харилцах, мэдээлэл боловсруулах албаны дарга Ё.Батбаяр, УИХ-ын Мэдээлэл боловсруулах, олон нийттэй харилцах хэлтсийн дарга Д.Энхтуяа нар хэвлэлийн бага хурал зохион байгууллаа.
Монгол Улс Ардчилсан орнуудын хамтын нийгэмлэгийг 2011 оны долдугаар сараас эхлэн даргалж байгаа тул ийнхүү Ардчилсан орнуудын хамтын нийгэмлэгийн Сайд нарын VII бага хурлыг эх орондоо зохион байгуулж байгаа юм.
Энэ хуралд дэлхийн 104 орны 1215 төлөөлөгч оролцохоор бүртгүүлжээ.
Төлөөлөгчдийн дунд улсын Ерөнхийлөгч нэг, дэд Ерөнхийлөгч хоёр, Ерөнхий сайд нэг, Шадар сайд дөрөв, бусад нь сайд нарын төвшний төлөөлөгчид байгаа бөгөөд олон улсын 20 байгууллага, иргэний нийгэм, бусад чиглэлийн төлөөлөгч хүрэлцэн ирэхээр болжээ.
Монгол Улсын Ерөнхийлөгч Ц.Элбэгдоржийн урилгаар Нобелийн Энхтайвны шагналт, хүний эрхийн төлөө тэмцэгч, Мьянмарын Үндэсний Ардчилсан Лигийн тэргүүн хатагтай Ан Сан Сү Чи, Йемений Нобелийн Энхтайвны шагналт, хатагтай Таваккол Карман нар хүрэлцэн ирэх юм.
Иргэний нийгэм, Эмэгтэйчүүд, Залуучууд, Бизнесийн зэрэг салбар хуралдаануудыг Улаанбаатар хотын томоохон зочид буудлуудад зохион байгуулахаар төлөвлөсөн байна.
Тус хурал Монголд болохыг хоёр жилийн өмнө шийдэж энэ 2013 оны Улсын нэгдсэн төсөвт гурван тэрбум төгрөг тусган зарцуулахаар болжээ.
Хурлыг угтаж нийслэлийн хот тохижилтын ажлыг эрчимжүүлж, хотын төвийн зам талбай, ногоон байгууламжуудыг цэвэрлэх, сэргээн засах ажил хийснээс гадна хурлын өдрүүдэд авто машиныг сондгой, тэгш дугаараар хөдөлгөөнд хуваан оролцуулж томоохон худалдаа үйлчилгээний захуудын цагийн хуваарьт өөрчлөлт оруулах юм байна.
Монголд анх удаа ийм өндөр хэмжээний хурал болж байгаа нь Монгол Улсын нэр хүндийг дэлхийн тавцанд өргөх, ардчиллын суурь зарчим, ирээдүйн хөгжилд үнэтэй хувь нэмэр оруулах ач холбогдолтой гэдгийг хэвлэлийн бага хурал зохион байгуулагчид хэллээ.
Гадаадын хэвлэл мэдээллийн 50 гаруй байгууллагын төлөөлөл, Монголын 200 гаруй сэтгүүлч уг үйл ажиллагааг сурвалжлахаар болжээ.
АОХН-ийн Сайд нарын VII бага хуралд 104 орны 1215 төлөөлөгч оролцоно
