Монгол Улсын Ерөнхийлөгчид АНУ-ын Төрийн департаментын нэгдүгээр орлогч, Чехийн Шадар сайд бөгөөд Гадаад хэргийн сайд, Шведийн Гадаад хэргийн сайд нар бараалхав
АОХН-ийн Сайд нарын долдугаар бага хуралд оролцож байгаа АНУ-ын Төрийн департаментын нэгдүгээр орлогч Билл Бернс, Чехийн Шадар сайд бөгөөд Гадаад хэргийн сайд Карел Шварценберг, Шведийн Гадаад хэргийн сайд Карл Билдт нар өнөөдөр Монгол Улсын Ерөнхийлөгчид бараалхлаа.
АНУ-ын Төрийн департаментын нэгдүгээр орлогч Билл Бернс Монгол Улсын Ерөнхийлөгч Ц.Элбэгдоржид бараалхах үеэрээ Монгол Улс АОХН-ийг хоёр жил даргалж АОХН-ийн Сайд нарын долдугаар бага хурлыг эх орондоо зохион байгуулж байгаад талархал илэрхийллээ.
Монгол Улсын санаачлагаар АОХН-ийн Сайд нарын долдугаар бага хурлын үеэр авлигын сэдвийг тусгайлан авч хэлэлцэж байгаа нь чухал ач холбогдолтой болохыг ноён Билл Бернс тэмдэглэлээ. Авлига бол ардчиллын дайсан. Тиймээс авлигатай тууштай тэмцэх нь ардчиллыг гүнзгийрүүлэн хөгжүүлэхэд чухал ач холбогдолтой болохыг онцолж байв.
Монгол Улс сүүлийн нэг жилд авлигын индекс нь огцом буурсан орон болсныг Монгол Улсын Ерөнхийлөгч дурдаад энэ чиглэлийн ажлыг цаашид ч гүнзгийрүүлэх болно гэлээ. Уулзалтын үеэр Монгол Улсын Ерөнхийлөгч, АНУ-ын Төрийн департаментын нэгдүгээр орлогч нар олон улсын болон бүс нутгийн аюулгүй байдал, хоёр орны харилцааны талаар санал солилцов
Чехийн Шадар сайд бөгөөд Гадаад хэргийн сайд Карел Шварценберг АОХН-ийн Сайд нарын бага хурал Монголд амжилттай болж, Монгол Улс ардчилал гүнзгийрсэн орон болсныг тэмдэглэлээ. Мөн авлигатай тэмцэх асуудлаар ярилцав.
Монгол Улсын Ерөнхийлөгч Ц.Элбэгдорж Олон улсын “Transparency International” байгууллагаас гаргасан судалгаагаар хэдэн жилийн өмнө Монгол Улс авлигын төвшнөөр 120 дугаарт орж байсан бол өнөөдөр 94 дүгээр байрт орж ганцхан жилийн дотор Монголын авлигын индекс 26 орноор буурсан. Энэ бол Монголын төр сайн жишиг тогтоохын төлөө явж байгаагийн илрэл гэдгийг хэллээ.
Уулзалтын үеэр Монгол Улс АОХН-ийг амжилттай даргалаад Эль Сальвадор улсад халаагаа өгөх гэж байгаа талаар ярилцаж, уул уурхай, эдийн засаг, боловсролын салбарын хамтын ажиллагаа, олон улсын асуудлаар санал солилцлоо.
Шведийн Гадаад хэргийн сайд Карл Билдт Монгол Улсын Ерөнхийлөгчид бараалхах үеэрээ Чингис хааны үеийн Монголын түүхээс сонирхож байв. Ирэх 2014 онд Монгол Улс, Шведийн Вант улсын хооронд дипломат харилцаа тогтоосны 50 жилийн ой тохиох юм. Энэ ойг тэмдэглэх талаар талууд ярилцлаа.
Монголын ардчиллын туршлагаас Киргиз улс судалж байгаа болон Мьянмарын ардчиллын төлөө тэмцэгч, Нобелийн шагналт хатагтай Ан Сан Су Чи Монгол Улсын Ерөнхийлөгчийн урилгаар АОХН-ийн Сайд нарын долдугаар бага хуралд оролцон үг хэлж, Монгол Улсын Ерөнхийлөгчийн хамт лекц унших гэж байгаа талаар дурдав.
Мөн Монгол, Шведийн цаашдын хамтын ажиллагаа, олон улс, бүс нутгийн асуудлаар харилцан санал солилцов.
Монгол Улсын Ерөнхийлөгчид АНУ-ын Төрийн департаментын нэгдүгээр орлогч, Чехийн Шадар сайд бөгөөд Гадаад хэргийн сайд, Шведийн Гадаад хэргийн сайд нар бараалхав
