Монголын урлагийн салбарын төлөөлөл өнөөдөр, Их хуурч Г.Жамъяны 90-насны ойг тохиолдуулан Монгол Улсын Ерөнхийлөгч Ц.Элбэгдоржид хүндэтгэлийн морин хуурыг гардууллаа.
“Морин хуур бол монголын ард түмэнтэй хамт олон зуун жилийн жаргал зовлонг туулж, эв нэгдлийн бэлгэдэл болсон, монгол айл бүрийн хойморт залрах эрхтэй хөгжим юм. Өнөөдөр Төр, ард түмний эв нэгдлийн илэрхийлэл, хөгжил дэвшлийн түлхүүр болсон Монгол Улсын Ерөнхийлөгчид манай мастеруудын ур ухаан шингэсэн энэхүү хүндэтгэлийн морин хуурыг гардуулж байгаадаа баяртай байна” хэмээн “Морин хуур” төвийн тэргүүн Ц.Пүрэвхүү хэллээ.
1990 онд Монгол Улсын анхны Ерөнхийлөгч төрийн Ханхуурыг төрийн өргөөнд залж, тухайн үеийн шадар сайд асан Д.Дорлигжав нарын санаачлагаар морин хуурын бие даасан чуулга байгуулж байсан нь, монголчууд морин хуураа дээдлэн, эрхэмлэх үзлийг сэргээсэн төдийгүй, морин хуурын талаар судалгаа шинжилгээний ажил эрчимжиж, дэлхийн энтэй бүтээл хэмээн зүй ёсоор хүлээн зөвшөөрүүлэхэд ихээхэн хувь нэмрээ оруулсан гэдгийг тэрээр мөн нэмж хэллээ.
Ерөнхийлөгч Ц.Элбэгдорж “ Монголын ард түмэн үндэсний эрх чөлөө, тусгаар тогтнолоо сэргээн тогтоосон энэ сайхан өдөртэй давхцаж, та бүхэн хүндэтгэлийн морин хуурыг төрдөө өргөн барьж байгаа нь сайхан үйл явдал болж байна. Бид монголын ард түмний өв уламжлал, оюун санааны дархлааг авч явдаг хүмүүсээ зарлан тунхаглаж, алдаршуулж, дэмждэг байх ёстой. Та бүхэн саналаа нэмэрлээрэй” гэлээ.
Хүндэтгэлийн морин хуурыг Ардын жүжигчин Ч. Батчулуун, Ардын жүжигчин Ч.Батсайхан , хөгжим урлаач мастер Д.Уламбаяр, “Морин хуур” төвийн тэргүүн Ц.Пүрэвхүү нар хөглөн, төрийн ордоны жаврыг үргээлээ.
Хүндэтгэлийн морин хуурыг хөгжим урлаач, мастер Д.Уламбаяр бүтээжээ.
Энэ уулзалтанд морин хуурыг түгээн дэлгэрүүлэх үйлсэд хувь нэмрээ оруулж байгаа манай улсын урлагийн сургуулиудын удирдлага мөн оролцож, Ерөнхийлөгчтэй санал бодлоо солилцлоо.
