Монгол Улсын Ерөнхийлөгч Ц.Элбэгдорж зарлиг гарган Монгол Улсын гадаад харилцааны салбарыг хөгжүүлэхэд үнэтэй хувь нэмэр оруулан, олон жил үр бүтээлтэй ажилласан нэр бүхий хүмүүст дипломат цол гардууллаа.
Үүнд, Монгол Улсаас Бүгд Найрамдах Турк Улсад суугаа онц бөгөөд бүрэн эрхт элчин Очирын Очиржав, дипломат Равдангийн Хатанбаатар нарт Онц бөгөөд Бүрэн эрхт Элчин сайд цол хүртээлээ.
Мөн Монгол Улсаас БНХАУ-д суух Онц бөгөөд Бүрэн эрх Элчин сайд Цэдэнжавын Сүхбаатар, ЗТБХБЯ-ын Сайдын зөвлөх Лодойдамын Галбадрах, ГХЯ-ны консулын газрын захирал Дамбын Ганхуяг, Ахмад дипломат Ширчинжавын Юмжав, Ахмад дипломат Чойжилжавын Болд, Монгол Улсаас Бүгд Найрамдах Франц Улсад суугаа Онц бөгөөд Бүрэн эрхт Элчин сайд Шүхэрийн Алтангэрэл, Монгол Улсаас Бүгд Найрамдах Ардчилсан Лаос Улсад суугаа Онц бөгөөд Бүрэн эрхт Элчин сайд Тогтохбаярын Батбаатар, ОХУ-ын Улаан-Үд хотод суугаа ЕКГ-ын консул Лувсандоржийн Мундагбаатар, Монгол Улсаас Бельгийн Вант Улсад суух Онц бөгөөд Бүрэн эрхт Элчин сайд Авирмэдийн Баттөр нарт Онц бөгөөд Бүрэн эрхт Элчин цолыг тус тус хүртээлээ.
Дипломат цол гардуулах үеэр Монгол Улсын Ерөнхийлөгч дипломатчидад хандан хэлэхдээ, “Та бүхэн бол Монгол төрийн гадаад бодлогыг хэрэгжүүлэх, Монгол Улсын гадаад харилцааг хөгжүүлэхэд үнэтэй хувь нэмэр оруулан, олон жил үр бүтээлтэй ажиллаж ирсэн, мөн ажиллаж байгаа, Монгол Улсынхаа нэр төрийг дэлхий олон оронд төлөөлөн явсан нэр төртэй хүмүүс ээ.
Та бүхний хөдөлмөр зүтгэлийг Монголын төр өндрөөр үнэлж, цаашид хийх ажилд тань урам зориг өгч, Төрийн эрхэм хүндэт дипломат цолийг Монголын орчин цагийн дипломат алба үүсч хөгжсөний түүхэн энэ өдөр олгож байна.
Өнгөрч буй 2009 он бол Монгол Улсын хувьд гадаад харилцааны салбарт хийгээд дипломатчдын хувьд өндөр бүтээмжтэй, баялаг түүхтэй жил байлаа.
Төрийн алтан аргамж хэмээн эртнээс нэрлэгдэж ирсэн дипломат алба улс орныхоо нүүр царай, өнгө төрх, гадаад илэрхийлэл нь болж байдаг. Тийм ч учраас Монголын сайн нэр, гэрэл гэгээтэй дүр төрхийг дэлхийд таниулах хариуцлагатай үүрэг хүлээсэн хүмүүс бол Та нар юм” гэж онцоллоо.
