Эрхэмсэг ноён Дипломат корпусын ахлагч аа,
Элчин сайд, Хэргийг түр хамаарагч нар аа,
Олон улсын байгууллагын төлөөлөгчид өө,
Эрхэмсэг хатагтай, ноёд оо,
Өөрсдийн улс орон, олон улсын байгууллагаа Монгол Улсад төлөөлөн суух эрхэм үүргийг амжилттай гүйцэтгэж байгаа эрхэмсэг хатагтай, ноёд Та бүхэнтэй хамт хуучин оноо үдэж, шинэ оноо угтан уулзаж байгаадаа миний бие баяртай байна.
2009 он Монголын ард түмний хувьд, Төрийн Тэргүүнээ сонгож, Улсын Их хурал, Засгийн газар нийгэм эдийн засгийн чухал шийдвэрүүдийг гаргалаа. Монголын ард түмний хамтын бүтээл түүхэн бахархал болсон Ардчилсан хувьсгалын 20 жилийн ой тохиосон сайхан жил боллоо.
Бид, Та бүхний төлөөлөн суугаа орнууд болох Монголын ардчилал, шинэчлэлийг анхнаас нь тууштай дэмжиж ирсэн найрсаг харилцаатай улс орнууд, олон улсын байгууллагуудын туслалцаатайгаар улс эх орныхоо хөгжлийн томоохон зорилтуудыг амжилттай хэрэгжүүлж ирлээ.
Монгол улсын гадаад бодлогын залгамж чанарыг хадгалан, бүх талаар өргөжүүлэх бэхжүүлэх нь Төрийн Тэргүүний бодлого үйл ажиллагааны тэргүүлэх чиглэлийн нэг бөгөөд, энэ хүрээнд бид өнгөрсөн онд чамгүй ололттой ажиллалаа. Өөрийн орондоо хүлээн авсан мөн гадаад орнуудад хэрэгжүүлсэн өндөр хэмжээний айлчлалуудыг энд дурдахад таатай байна.
ОХУ-ын Ерөнхийлөгч Д.А.Медведевийн Монгол Улсад хийсэн айлчлал хоёр орны харилцааг стратегийн түншлэлд хүргэлээ. Дэлхийн хамгийн том ардчилсан орон болох БНЭУ-д хийсэн Монгол Улсын Төрийн Тэргүүний айлчлалын үр дүнд хоер орны харилцаа Иж бүрэн түншлэлийн хэмжээнд хүрснийг тунхаглалаа. НҮБ-ын Ерөнхий Ассамблейн ээлжит чуулганы индэр дээрээс хүн төрөлхтөний өмнө тулгараад байгаа томоохон сорил, бэрхшээлүүдийг даван туулахад Монгол улс бүтээлч оролцогч байхаа дахин нотоллоо.
НҮБ-ын Ерөнхий Нарийн бичгийн дарга Бан Ги Мүний манай улсад хийсэн айлчлал нь Монгол Улсын олон талт дипломат үйл ажиллагааг өргөжүүлэхэд үнэтэй хувь нэмрээ орууллаа.
Хэдхэн хоногийн өмнө Данийн нийслэл Копенхаген хотноо дэлхийн 115 орны лидер хуран цугларч, хүн төрөлхтөний оршин тогтох эсэхэд заналхийлж буй цаг уурын өөрчлөлтийн талаарх хэлэлцүүлэгт Монгол Улс өөрийн шийдлийг танилцуулж, мэдрэгдэхүйц, бодитой хувь нэмэр оруулж чадахаа илэрхийллээ. Копенхаген бол НҮБ-ын түүхэнд байгаагүй томоохон цугларалт болж, дэлхийн бодлого боловсруулагчид нэгэн дээвэр дор улстөрийн хүсэл эрмэлзлээ нэгтэж чадсанаараа амжилт болсон юм.
Энэ үеэр миний бие, Та бүхний төлөөлөн суугаа ихэнх орнуудын Төр засгийн тэргүүнүүдтэй уулзаж, хоёр талын болон олон талт хамтын ажиллагаанд түлхэц болохуйц яриа хэлэлцээ өрнүүлснийг тэмдэглэн хэлэхэд таатай байна. Эдгээр яриа хэлэлцээ бодит ажил хэрэг болоход Хүндэт Элчин сайдууд та бүхний оролцоо, зүтгэл нэн чухал байх болно.
Хатагтай, ноёд оо,
Монголоос гадаад ертөнцтэй харилцах гүүр болж ирсэн Элчин сайд, Суурин төлөөлөгч Та нарт Монголын төр талархал илэрхийлж байна. Та бүхний төлөөлөн суугаа найрсаг харилцаат хөрш, түнш орнууд, олон улсын байгууллагатай тогтоосон манай харилцаа, хамтын ажиллагаа ирж буй шинэ 2010 онд өргөжин хөгжинө гэдэгт итгэл дүүрэн байна.
Ирж буй шинэ онд Та бүхэнд болон Та бүхний гэр бүлд Монголын ард түмний нэрийн өмнөөс эрүүл энх, аз жаргалыг хүсэн ерөөе.
Баярлалаа.
