Өнөөдөр Азийн архитекторуудын 15 дугаар их хурал Засгийн газрын ордны их танхимд эхэллээ. Хоёр өдөр үргэлжлэх тус хуралд Олон Улсын Архитекторуудын Холбоо (ОУАХ)-ны Ерөнхийлөгч хатагтай Льюс Кокс, ARCASIA-ийн дарга ноён Мубашар Хусайн болон Азийн 19 орны Архитекторуудын нийгэмлэг, холбоодын төлөөлөгчид оролцож байна.

Монгол Улсын Ерөнхнийлөгч Цахиагийн Элбэгдорж тус их хуралд оролцон үг хэлсэн юм. Тэрээр хэлсэн үгэндээ: “Архитекторчдын өмнө хоёр том бэрхшээлтэй асуудал тулгарч байна гэж би хувьдаа үздэг.
Нэг дэх нь мэдээж хэрэг хотжилтын асуудал. 100 жилийн өмнө хүн төрөлхтний 25 хувь нь хотод амьдарч байсан бол өдгөө 56 хувь болжээ. Цаашдаа 75 хувь болтлоо өсөх төлөв байгааг та бүхэн мэдэж байгаа. Ялангуяа Ази тивд хотжилт маш эрчимтэй явагдаж байна.

Удаах асуудал нь цаг агаарын өөрчлөлт, дэлхийн дулаарал юм. Үүнд нөлөөлж байгаа хүчин зүйлийн бараг 70 орчим хувь нь хотжилттой холбоотой. Тэгэхээр хотжилт, барилгажилт, архитекторын шийдлийг бид зөв тодорхойлж, хөгжүүлж чадвал хүн төрөлхтний өмнө тулгамдаж байгаа дэлхийн дулаарал, цаг агаар, байгал экологийн тэнцвэрийн асуудлыг нааштай болгох боломж байгаа” гэж онцлон тэмдэглэв.

Ерөнхийлөгч цааш өгүүлэхдээ: “Монгол Улсын хувьд түүхэн онцлог бий. Найман зууны өмнө Монголчууд олон орны архитекторууд, Монголын уран дархдын хүчээр Нийслэл Хархориноо босгож байсан сайхан түүх бий. Өнөөдөр найман зууны дараа Монгол оронд маань энэ олон орны архитекторууд цуглаад Монгол Улсын шинээр хотжилтыг шийдэх энэ чухал үед та бүхэн нийслэл хотод маань чуулан хуралдаж байгаа нь үнэхээр түүхэн ач холбогдолтой” болохыг оролцогчдод хандан хэллээ.

Ийнхүү Ерөнхийлөгчийн ивээл дор зохион байгуулагдаж буй Ази тивийн орон орны уран барилгачид чуулсан 15 дугаар их хурлын ажиллагаанд Монгол Улсын Ерөнхийлөгч амжилт хүсч аливаа улс орны хөгжил дэвшлийн хөдөлгөгч хүч нь та бүхний хөдөлмөр зүтгэлээс эхтэй хэмээн архитекторчидод талархал илэрхийлэв.