75 жилийн туршид ургах нартай уралдан өглөө бүр төрийнхөө дууллыг Монгол орон даяараа дуурсган сэрээж ирсэн Монголын радиогийн үе үеийн уран бүтээлчид, инженер техникийн ажилтан, ажилчид, ахмадууд Та бүхэндээ Монголын радио үүсч хөгжсөний түүхт ойн баярын мэндчилгээ дэвшүүлье!
Та бүхэн ард түмэндээ хамгийн шинэ сэргэг мэдээ, мэдээллийг хамгийн түрүүнд хүргэж, дуу хуур, үүх түүх, алдаа оноо, хөгжил дэвшил төдийгүй ертөнц дахины анирийг сонордуулсан мянга мянган нэвтрүүлэг бүтээн, түмэн олныхоо оюуныг тэлж, улс орноо эрин зууны хөгжил дэвшилтэй хөл нийлэн алхахад үнэтэй хувь нэмэр оруулж ирсэн билээ.
Отрын бэлчээрт ч, атрын майханд ч, үйлдвэрийн цехэд ч, эрдмийн танхимд ч, ер хаа л бол хаана Та бүхний дуу хоолой сонсогдож, бүтээлч эрч хүч, хөгжил дэвшил өөд уриалан дуудаж байсныг өнөөдөр бахархан дурсахад нэн таатай байна.
Монгол гэрийн хойморт эгшигт хайрцаг бурхантай зэрэгцэн залагдаж асан тэртээх 1934 оноос хойш Монголын Радио зөвхөн монгол түмэндээ нэвтрүүлгээ хүргээд зогсохгүй англи, орос, хятад, япон, хэлний өргөн нэвтрүүлгээрээ эх орноо олон улстай холбох гүүр нь болж, улс орноо дэлхий дахинаа таниулан сурталчилж ирсэн Та бүхний бүтээлч хөдөлмөрийн үр шимийг монголын төр ямагт бахархан хүндэтгэж байдаг юм.
Монголын радио бол монгол түмний оюун билэг, соёл гэгээрлийн нэгэн их сүмбэр орд өргөө билээ.
Их говийн хүрэн улаан тэмээдийн ширэлдсэн зогдорт уяатай байсан “Араажав” өмнөх зуунд үүргээ амжилттай гүйцэтгээд шинэ зууны босгыг алхжээ. Монголын радио, хорин нэгдүгээр зууны мэдээллийн хүчирхэг давалгааны нэгэн байж, цаашид улам хөгжин дэвшинэ гэдэгт итгэл дүүрэн байна.
Түүхэн ойгоо тэмдэглэж буй Монголын Үндэсний Олон Нийтийн Радиогийн нийт хамт олонд болон сонсогч түмэндээ сайн сайхан бүхнийг хүсэн ерөөе!
Монгол Улсын Ерөнхийлөгч
Цахиагийн ЭЛБЭГДОРЖ
