Эх орныхоо өмөг түшиг, түмэн олынхоо ноён нуруу, хойч үеийнхээ бахархал, үлгэр дууриал, болсон ахмадуудаа!
Олон улсын болон Монголын ахмадын өдрийг орон даяар тэмдэглэдэг сайхан уламжлал тогтоод 17 жил болжээ. Энэ хүндэтгэлт өдрийг тохиолдуулан өнөөдрийг бүтээсэн гавъяатай эрхэм хүндтэй ахмадууд Та бүхэнд Монголын төр гүн хүндэтгэлээ илэрхийлж байна.
Та бүхэндээ Ахмадын өдрийн баярын мэндийг чин сэтгэлээсээ дэвшүүлж байгааг минь хүлээн авна уу.
Монголын яруу алдарт ахмадуудаа!
Та бүхэн өдгөө цагийн хөгжил дэвшил, сайн сайхан бүхнийг цаг наргүй бүтээлч хөдөлмөрөөрөө, сэтгэл зүтгэлээрээ, оюун ухаанаараа бүтээж орчин цагийн монгол улсын өнгө төрхийг цогцлоосон, тусгаар тогтнолоо дэлхийн тавцанд дархалж өвлүүлсэн гавъяатнууд юм.
Та бүхний хуримтлуулсан арвин баялаг туршлага, эрдэм мэдлэг, хойч үеэ гэсэн чин шударгуу сэтгэл тань өнөөдөр ч гэсэн үнэ цэнэтэй хэвээрээ байгаа. Тэр бүхнээс тань бид сургамж авч, алхам тутамдаа, ажил үйлсдээ тусгаж байхыг хичээн ажиллах болно. Ийм ч учраас Та бид бүгдээрээ хөгжингүй монголын шинэ маргаашийг хамтран бүтээж байна.
Настан буурлууд Та бүхэн маань Монгол орны 20 дугаар зууны баялаг түүхийн амьд хуудсууд юм.
Төрийн тэргүүний хувьд ахмад үеэ хүндэтгэх, гавъяа зүтгэлийг нь үнэлэх, алдаршуулах, ялангуяа ахмадуудынхаа нийгмийн асуудлыг зөв зүйтэй шийдвэрлүүлэх талаар өөрийн зүгээс бололцоотой бүхнийг хийх болно.
Та бүхэндээ эрүүл энх, аз жаргал, сайн сайхан бүхнийг хүсэн ерөөе!
Монгол Улсын Ерөнхийлөгч
Цахиагийн ЭЛБЭГДОРЖ
