Монгол Улсын Ерөнхийлөгч Цахиагийн ЭЛБЭГДОРЖ- ийн Төрийн дайллагад хэлсэн үг
Эрхэм хүндэт зочид оо,
Эрхэмсэг хатагтай ноёд оо,
Монгол түмний Үндэсний их баяр наадмын төрийн дайллагад бидний урилгыг хүлээн авч хүрэлцэн ирсэн Та бүхэнд өөрийн болон гэргий Х.Болормаа, хүүхдүүдийнхээ нэрийн өмнөөс чин сэтгэлийн талархал илэрхийлж хамгийн сайн сайхныг хүсэн ерөөж мэндчилье.
Монголын тулгар төрийн түүхэн их, тэгш дүүрэн ой-2222 жил, Монгол төрийн Тэргүүний тангараг өргөх ёслол давхцаж байгаа нь түүхэн бэлгэдэлтэй. Сонгуульд идэвхтэй оролцсон ард иргэддээ болон чин сэтгэлээсээ дэмжлэг үзүүлсэн олон байгууллага, хүмүүст гүн талархлаа илэрхийлье.
Монгол наадам бол улс үндэстнийхээ түүх соёл, уламжлал заншлаар бахархах манай ард түмний баяр цэнгэлийн дээд юм. Манай наадамд оролцож, үзэж сонирхохоор хүрэлцэн ирсэн олон хүндэт зочид, анд нөхөдтэйгээ бид баяраа хуваалцаж байгаадаа туйлын баяртай байна.
Монгол Улсын ололт амжилт бол манай сая сая иргэдийн ололт амжилт төдийгүй манай орон, байгууллага, ард иргэдтэй хамтран ажилладаг нийт хүмүүсийн хамтын хөдөлмөр бүтээлийн үр дүн юм. Энэ үдшийн төрийн дайллагын урилгыг хүлээн авч хүрэлцэн ирсэн эрхэмсэг хатагтай ноёд Та бүхэнд гүн талархаж байгаагаа дахин илэрхийлэхийн ялдамд баяр наадмын энэхүү сүүн хундагыг,
- Монгол улсынхаа хөгжил цэцглэлтийн төлөө
- Ард түмнийхээ аз жаргалын төлөө
- Эрхэмсэг хатагтай ноёдын эрүүл энхийн төлөө өргөе.
2013.07.11
Монгол Улсын Ерөнхийлөгч Цахиагийн ЭЛБЭГДОРЖ- ийн Төрийн дайллагад хэлсэн үг
