"Монгол Улсад ардчилсан хөдөлгөөн үүссэний 20 жилийн ой”-н олон улсын бага хурлыг зохион байгуулагчид болон тус хурлыг ивээлдээ авагч Монгол Улсын Ерөнхийлөгч Эрхэмсэг ноён Цахиагийн Элбэгдорж танаа, мөн хүрэлцэн ирсэн хүндэт зочид Та бүхэнд чин сэтгэлийн халуун мэндийг өргөн дэвшүүлье.
Тэртээ 20 жилийн өмнө Залуучуудын ордны өмнөх талбай дээр цугласан олон зуун зоригт Монголчуудын эсэргүүцлийн жагсаалыг бид бүхэн өнөөдөр дурсан санаж байна. Зөвшөөрөл аваагүй тэр жагсаалын удирдагч нар жирийн нэг өдрийг санамсаргүйгээр сонгоод авчихсан хэрэг биш байлаа. Эрх чөлөөг эрхэмлэгч иргэд олон намын тогтолцоо, чөлөөт сонгуулийг шаардсан жагсаалыг Хүний Эрхийн Олон Улсын Өдөр зохион байгуулсан юм.
Нэг нам тасралтгүй 70 жил ноёрхож ирсэн коммунист дэглэмийн удирдагч нарт ийм шаардлагыг тавих нь асар их эз зориг шаардсан алхам байлаа. Энэхүү жагсаалын дуу хоолой нь өчигдөрийн залуу сэтгүүлч, харин өнөөдрийн Монгол Улсын Ерөнхийлөгч Цахиагийн Элбэгдорж байсан юм.
20 жилийн тэртээх тэр жагсаал нь нийгмийг сэрээн, өртөөлөх бамбар болон дүрэлзэж тайван хувьсгалын эхлэлийн цэг болсон билээ. Тэр цуглаан Монголын ардчилсан хөдөлгөөний үйл хэрэг эргэлт буцалгүй болсныг харуулсан юм. Монголчууд өнөөдөр эрх чөлөө, хүний эрх, эрх зүйт төрийн үзэл санааг өөрийн болгож чаджээ. Та бүхний хүрсэн амжилтыг Берлиний хана нурсан унасны 20 жилийн ойгоо саяхан тэмдэглэж өнгөрөөсөн Германчууд бид өндөр үнэлэхийн зэрэгцээ хүндэтгэл үзүүлэн баяр хүргэж байгаагаа илэрхийлье.
Монгол Улс өнөөдөр Ардчилалыг амжилттай мөн туулах чадвар сайтай болгон хөгжүүлж буй орон болжээ. Хэдий харьцангуй шинэ, залуу ч гэсэн тогтвортой улс төрийн байгуулалыг нь харахад Монгол Улс ирээдүйгээ өөдрөгөөр харж, итгэлтэй урагшлах үндэс, суурь бүрдсэн байна. Угтан тосох цаашдын замналд тань Монголчууд та бүхэнд Германы ард түмнээс сайн сайхан бүхнийг хүссэн ерөөж байна.
Манай хоёр орныг олон жилийн уламжлалт нөхөрлөл маань холбож байдаг билээ. Бидний хуваалцаж байдаг тэр хамтын үнэт зүйлс маань биднийг итгэл даах түншүүд болгож чаджээ. Энэ олон талт нөхөрлөл, хамтын ажиллагааны түншлэлээ цаашид улам бүр гүнзгийрүүлэн хөгжүүлэхийг бид хүсч байна. Үүний илрэл нь өнөөдрийн энэхүү хурал байг ээ.
Та бүхэнд болон хурлын үйл ажиллагаанд хувийн зүгээс амжилт хүсээд, оролцогчдын хооронд үр ашигтай харилцаа холбоо тогтоосон, чухал санаа бүхий хэлэлцүүлэг өрнөсөн арга хэмжээ болж өнгөрнө гэдэгт итгэж байгаагаа илэрхийлье.
АНГЕЛА МЕРКЕЛЬ
