Монгол Улсын Ерөнхийлөгч Цахиагийн Элбэгдорж 2013 оны 9 дүгээр сарын 22-27-ны өдрүүдэд НҮБ-ын Ерөнхий Ассамблейн 68 дугаар чуулганд оролцоно. НҮБ-ын Ерөнхий Ассамблейн 68 дугаар чуулганд 102 улс төрийн тэргүүний, 49 улс Засгийн газрын тэргүүний, 42 улс Гадаад хэргийн сайдын түвшинд оролцохоо мэдэгдээд байна.
Монгол Улсын Ерөнхийлөгч НҮБ-ын Ерөнхий Ассамблейн 68 дугаар чуулганы үеэр 9 дүгээр сарын 23-ны өдөр Хөгжлийн бэрхшээлтэй иргэдийн асуудлаар Ерөнхий Ассамблейн өндөр хэмжээний уулзалт, “Хөгжлийн үйлсэд хөгжлийн бэрхшээлтэй иргэдийн оролцоо ба олон улсын болон бүс нутгийн хамтын ажиллагаа, түншлэл” дугуй ширээний хэлэлцүүлэг, 9 дүгээр сарын 25-ны өдөр Мянганы хөгжлийн зорилтуудыг эрчимжүүлэх асуудлаарх НҮБ-ын Ерөнхий Ассамблейн Тусгай арга хэмжээ, 9 дүгээр сарын 26-ны өдөр Олон улсын Энх тайвны хүрээлэнгээс зохион байгуулах арга хэмжээ, Цөмийн зэвсгийг хураах асуудлаарх Ерөнхий Ассамблейн өндөр хэмжээний уулзалт, НҮБ-ын Ерөнхий Ассамблейн Бүгд хуралдаанд оролцож үг хэлнэ.
Монгол Улсын Ерөнхийлөгч Ц.Элбэгдорж Нью Йорк хотноо ажиллах хугацаандаа НҮБ-ын Ерөнхий нарийн бичгийн дарга Бан Ки Мүн-тэй уулзах, Ардчилал хөгжиж байгаа улсууд дахь иргэний нийгмийн байгууллагууд” сэдэвт хэлэлцүүлгийг АНУ-ын Ерөнхийлөгч Барак Обаматай хамтран удирдах, Нью Йоркт төвтэй Олон улсын Энх тайвны хүрээлэнгээс зохион байгуулах ”Ардчилал ба түншлэл” арга хэмжээнд үндсэн илтгэгчээр оролцохоор төлөвлөж байна.
Эх сурвалж: Гадаад Харилцааны Яам
