НҮБ-ын Ерөнхий Асамблейн ээлжит 68 дугаар чуулган нээлтээ хийлээ
НҮБ-ын Ерөнхий Ассамблейн 68 дахь удаагийн чуулган өчигдөр 193 орны төр, засгийн тэргүүдийг нэгтгэн АНУ-ын Нью-Йорк хотноо нээлтээ хийлээ. Энэ удаагийн чуулганд Монгол Улсын Ерөнхийлөгч Цахиагийн Элбэгдоржийг дагалдан Гадаад харилцааны сайд Л.Болд болон албаны бусад хүмүүс оролцож байна.
Чуулганы эхний өдөр (9 дүгээр сарын 23) төр, засгийн тэргүүдийн анхаарлаа хандуулсан сэдэв нь Хөгжлийн бэрхшээлтэй иргэдийн асуудлын тухай байв. “Хөгжлийн бэрхшээлтэй иргэдийн асуудлаарх өндөр хэмжээний уулзалтыг нээж НҮБ-ын 68 дугаар Ерөнхий Ассамблейн Ерөнхийлөгч Жон Вилиам Ашэ, НҮБ-ын Ерөнхий нарийн бичгийн дарга Бан Ги Мүн нар үг хэлэв.
НҮБ-ын Ерөнхий нарийн бичгийн дарга Бан Ги Мүн хэлэхдээ “Дэлхий дээр нэг тэрбум гаруй хөгжлийн бэрхшээлтэй иргэн аж төрж байгаагаас 80 хувь нь хөдөлмөрлөх насны иргэд байдаг. Тэдгээр иргэдийн 80 хувь нь хөгжиж буй улс оронд амьдарч байна. Хөгжлийн бэрхшээлтэй хүмүүс бусдын нэгэн адил иргэний, улс төрийн, эдийн засгийн, нийгмийн, соёлын бүхий л эрхийг ялгалгүйгээр эдлэх эрхтэй. Харин эдгээр эрхийг бүрэн дүүрэн эдлүүлэх арга зам нь ялгаатай бөгөөд тусгай орчин нөхцөл, хэрэглэгдэхүүн шаардлагатай” гэж онцоллоо. Чуулганы нээлтэд Монгол, Испани, Филиппин, Тунис улсын төр, засгийн тэргүүд үг хэлсэн бөгөөд тэд бүгд хөгжлийн бэрхшээлтэй иргэдийн хөдөлмөр эрхлэлтийг дэмжих, хууль эрх зүйн орчинг сайжруулах, бүх шатны боловсрол эзэмших, зах зээлд эрэлттэй байгаа мэргэжлээр сургаж бэлтгэх, тэдний ажиллах нөхцөлийг хангасан ажил олгогчийг урамшуулах, хөгжлийн бэрхшээлтэй иргэдийн талаар төрөөс баримтлах бодлогыг зөвхөн нийгмийн хамгааллын бус, тэгш оролцоог хангах чиглэлээр ажиллах ёстойг онцолж байв.
НҮБ-ын Ерөнхий Асамблейн ээлжит 68 дугаар чуулган нээлтээ хийлээ
