Улсын Их Хурлын дарга, эрхэм гишүүд ээ!
Монгол Улсын Ерөнхий сайд Санжаагийн Баярын эрүүл мэндийн шалтгаанаар албан тушаалаасаа чөлөөлөгдөх хүсэлтийг Улсын Их Хурал хуралдаанаараа хэлэлцээд шийдвэр гаргасан байна.
Ерөнхий сайдаар ажилласан С.Баярт биеэ сайн эмчлүүлж, хурдан эдгэрэхийг чин сэтгэлээсээ хүсэж байна. Тэрээр Улсын Их Хурлын гишүүн, Парламентад олонхи суудалтай намын даргын хувьд улс орныхоо хөгжил дэвшлийн төлөө цаашид улам ихийг хийж бүтээнэ гэдэгт эргэлзэхгүй байна.
Монгол Улсын Ерөнхий сайдад Сүхбаатарын Батболдын нэрийг МАХН-аас дэвшүүлж надад өргөн барилаа. Монгол Улсын Үндсэн хуулийн 33 дугаар зүйлийн 1 дэх хэсгийн 2-т заасны дагуу Монгол Улсын Ерөнхий сайдаар Сүхбаатарын Батболдыг томилох саналыг Улсын Их Хуралд оруулж байна.
Сүхбаатарын Батболд нь УИХ, Засгийн газрын гишүүн, Гадаад харилцааны сайдаар ажиллаж байна. С.Батболд нь Олон улсын эдийн засагч мэргэжилтэй. 1963 онд төрсөн, туулай жилтэй, эхнэр хүүхдүүдийн хамт амьдардаг.
Сүхбаатарын Батболдыг Монгол Улсын Ерөнхий сайдын албан тушаалд томилох асуудлыг хэлэлцэн шийдвэрлэхийг Улсын Их Хурлаас хүсье.
Анхаарал тавьсанд баярлалаа.
