Сайн байцгаана уу,
Манай сонгодог урлагийнхан энэ жил өнгөтэй байна. Залуу дуучин Содномцэрэнгийн Мөнгөнцэцэг Глинкийн нэрэмжит дуурийн дуулаачдын уралдаанд тэргүүн байр эзэллээ. Спортоор бол энэ төрөлдөө дэлхийн аварга боллоо гэсэн үг.
Дуурийн урлаг өндөр хөгжсөн 19 орны шилмэл 181 дуучин өрсөлдсөн энэ тэмцээнээс алтан медаль хүртсэн нь Монгол Улсын хувьд анхны тохиолдол юм. Эх орныхоо сайн нэрийг сонгодог урлагийн түүхэнд ингэж өдөрт гаргасан Мөнгөнцэцэгтээ чин сэтгэлийн талархал илэрхийлье.
Дуурийн урлагт дэлхийн хэмжээний сонгодог уралдаанд сайн багш, сайн хөгжимчин гэдэг бол амжилтын нөгөө тал нь. Баттөмөрийн Солонго багш сүүлийн хоёр арван үргэлжлүүлэн ДБЭТеатрт дуурийн гоцлоочидтой ажиллаж байгаа дэлхийн дэвжээнд үнэлэгдсэн нэртэй хөгжимчин, дуурийн концертмейстер юм.
Удаа дараагийн дэлхийн болон олон улсын сонгодогуудын тэмцээн уралдаанд амжилттай оролцсон дуучдаа мэргэжлийн өндөр түвшинд бэлтгэж, хөгжмийг нь тоглож алдрын тайзнаа хөтөлсөн хүн бол манай Солонго багш. Сайн багш, сайн шавь хоёрын дэлхийн дэвжээнд хүрсэн амжилтыг өнөөдөр үнэлж байгаадаа би баяртай байна. Хоёр алдартны маань ард манай сонгодог урлагийнхны олон жилийн нөр их хичээл зүтгэл, хүсэл мөрөөдөл байгааг энд би тэмдэглэе.
Өнөөдөр бол ер бусын өдөр. Монгол түмний хамтын бүтээл 2009 он түүх болж, 2010 оны шинэ түүх хэдхэн цагийн дараа эхлэн бичигдэх торгон агшин. Энэ мөчид ард түмэндээ, хамт олондоо өндөр алдар нэр, их баяр баясал авч ирсэн хоёр гавъяатдаа баяр хүргэж амжилт хүсье. Сонгодог урлагийн тэнгэр алдартан, гавъяатнуудаар дүүрэн байх болтугай.
