Монгол Улсын Ерөнхийлөгч Ц.Элбэгдорж өнөөдөр Монголбанкны Ерөнхийлөгч Л.Пүрэвдоржтой уулзаж, зарим үүрэг чиглэлийг өглөө.
Монголбанкны Ерөнхийлөгч, монголын банкуудын өнөөгийн нөхцөл байдлын талаар мэдээлэл хийж, Ерөнхийлөгчийн асуултанд хариулсан. Тэрээр , “Монголын банкны салбарын байдал сайжирч байна, цаашдаа эрүүлжих боломж байгаа” гэж мэдэгдлээ.
Ерөнхийлөгч Ц.Элбэгдорж, “Монголбанк нь арилжааны банк төлбөрийн чадваргүй болж хүндэрсэн тохиолдолд бодлогын болон шуурхай үйл ажиллагааны ямар арга хэмжээг, хэрхэн авах талаар одоо хүртэл цэгцтэй, нийтэд ойлгомжтой бодлого, зарчим, жоргүй явж ирлээ. Өнгөрсөн хугацаанд хоёр ч арилжааны банкинд Монголбанк арга хэмжээ авлаа. Гэтэл шийдэж байгаа хэлбэр нь зарчмын хувьд өөр өөр байгаа нь ард олон нийтэд ойлгомжгүй, ар араасаа олон эргэлзээ, асуулт дагууллаа. Өвчин хүндрэл нь нэг байгаа бол, эмчилгээ нь ч нэг байх ёстой. Монголбанкны удирдлага энэ асуудал дээр тайлбараа ард нийтийн өмнө, Улсын Их хурал дээр тавих ёстой гэж үзэж байна. Эдийн засгийн амин зүрх болсон энэ салбарт хариуцлагын тогтолцоо үгүйлэгдэж байна. Арчилж тордох үүрэг хүлээсэн албан тушаалтнууд хариуцлага хүлээдэггүй, хянаж засах үүрэг хүлээсэн албан тушаалтнууд ч хариуцлага хүлээдэггүй тийм жишиг тогтож эхэллээ. Ашиг гарахаар нь хэдэн хүн хувааж авдаг, харин алдагдал ирэхээр нь ард түмний нуруун дээр тохдог ийм тогтолцоо зөв үү? Банк дампууруулах нь ашигтай бизнес болдог байж болохгүй. Гэм буруутай этгээдүүд хуулийн дагуу хариуцлага хүлээх ёстой” гээд Монголбанкнаас авч явуулж байгаа мөнгөний хатуу бодлого нь банкны салбарын одоогийн байдалд хэрхэн нөлөөлж байгаа, сөрөг нөлөө бий эсэх талаар дахин эргэн харж, дүгнэлт хийх шаардлагатайг санууллаа.
Тэрээр мөн,” Засгийн газрын аливаа үйл ажиллагааны зардал улсын төсвөөр дамжин хэрэгжиж байх ёстой. Нэгэнт УИХ-аар баталсан төсөвт суусан арга хэмжээ зардлыг санхүүжүүлэхэд эх үүсвэр дутагдаж байгаа бол, Засгийн газрын бонд гаргаж тухайн арга хэмжээг санхүүжүүлж болно. Харин бонд гаргаж байгаа нэрээр, төсөвт тусаагүй зардлыг гаргаж болохгүй” хэмээн анхаарууллаа.
