Монгол Улсын Ерөнхийлөгч Цахиагийн Элбэгдорж Монгол Улс дахь НҮБ-ын суурин зохицуулагч, НҮБ-ын Хөгжлийн Хөтөлбөрийн Суурин төлөөлөгч хатагтай Дебора Коминиг Монгол Улсаас бүрмөсөн буцаж байгаатай нь холбогдуулан өнөөдөр хүлээн авч уулзлаа.
Ерөнхийлөгч хэлэхдээ, НҮБ-ын Хөгжлийн Хөтөлбөр нь Монгол Улс дахь ядуурлыг бууруулах, сайн засаглалыг дэмжих, тогтвортой хөгжлийг хангахад чухал хувь нэмэр оруулсаар ирсэн юм. Ялангуяа Мянганы хөгжлийн зорилттойгоор уялдан боловсрол, жендерийн асуудал, нярайн болон эхийн эрүүл мэндийг хамгаалахад НҮБ-ын ХХ-ийн хэрэгжүүлсэн төслүүд чухал үүрэгтэй юм гээд хатагтай Д.Коминид Монгол улсад ажиллах хугацаандаа хичээл зүтгэл гаргаж ажилласанд талархал илэрхийлэв.
Мөн уулзалтын үеэр Монгол Улсын Ерөнхийлөгч Ц.Элбэгдорж саяхан болсон Копенхагены уулзалтаар НҮБ-ын Ерөнхий нарийн бичгийн Дарга Бан Ги Мүнтэй уулзаж дэлхийн дулаарлын асуудлаар санал солилцсоноо дурьдаад, цаг агаарын өөрчлөлтийн эсрэг дэлхий нийтийн тэмцэлд Монгол Улс идэвхитэй оролцож, энэ чиглэлээр НҮБ-ын үйл ажиллагааг дэмжиж буйгаа илэрхийлсэн юм.
Хатагтай Д.Комини хэлэхдээ Монгол Улс НҮБ-ын олон үйл ажиллагаанд идэвхитэй оролцдог, идэвхитэй гадаад бодлого хэрэгжүүлж буй улс бөгөөд олон улсын энхийг сахиулах ажиллагаанд ч амжилттай оролцож байгаад НҮБ талархаж байдаг гэв. НҮБ-ын Хөгжлийн хөтөлбөрийг Монгол Улсад амжилттай хэрэгжүүлэхэд туслалцаа үзүүлж, нөхөрсөгөөр хамтран ажилласанд Монгол Улсын Ерөнхийлөгч болон түүний ажлын албанд тэрээр талархалаа илэрхийлэв.
Уулзалтын төгсгөлд Монгол Улсын Ерөнхийлөгч хатагтай Д.Коминийн Панам Улсад эрхлэх шинэ албанд нь амжилт хүсэв.
