Өнөөдөр Монгол Улсын Ерөнхийлөгчийн хот, хөдөөгийн хөгжлийн бодлогын зөвлөх Л.Эрхэмбаяр Монголын Тариаланчид, гурил үйлдвэрлэгчдийн холбооны /МТГҮХ/ тэргүүн Ш.Гунгаадоржийг хүлээн авч уулзан Атрын гуравдугаар аян болон газар тариалангийн талаар төрөөс авч хэрэгжүүлж байгаа арга хэмжээний үр дүнгийн талаар санал солилцов.
Уулзалтын үеэр Ш.Гунгаадорж хэлэхдээ, “Монгол Улсын Засгийн газраас Атрын гуравдугаар аян зохион байгуулахаар шийдвэр гаргаж энэ салбарт хөрөнгө оруулалт хийж дэмжлэг үзүүлсэн нь бодлогын хувьд маш зөв арга хэмжээ болсон” хэмээн онцлов.
Мөн тэрээр, “Тус аян хэрэгжсэн хоёр жилийн туршлагаа дүгнэх нь чухал байна. Техникийн шинэчлэл, хангалтыг үргэлжлүүлэн хийх, буудайны чанарт анхаарч технологийн горим мөрдүүлдэг болгох нь чухал бөгөөд энэ ажлын хүрээнд, аж ахуйн нэгжүүдэд үтрэм байгуулах, үтрэмийн аж ахуйд тариагаа хатааж, цэвэрлэж гурилын үйлдвэрт тушаадаг болох, мөн Атрын дөрөвдүгээр аяныг өөр газар шинээр эхэлж хөрөнгө хүч тарамдуулснаас одоо эхэлсэн ажлаа улам өгөөжтэй болгоход хөрөнгө санхүүгээ чиглүүлэх, үрийн аж ахуйн бодлого явуулах шаардлагатай” гэж үзэж буйгаа танилцуулав.
Түүний тэргүүлж буй холбооны зүгээс ХХААХҮЯ-ны Тариалан эрхлэлтийг дэмжих санг олон нийтийн нээлттэй хяналт, оролцоотой байгууллага болгох ёстой гэж үзэж буй бөгөөд газар тариалангийн салбарыг зөв чиг гольдирлоор хөгжүүлэхийн төлөө анхаарал тавьж байгаа төрийн болон хувийн хэвшлийн ямар ч байгууллагатай хамтран ажиллахад бэлэн байгаагаа өгүүлэв.
