Монголын Олимпийн хорооны тэргүүн дээд шагнал гардуулж, Монгол Улсын 2013 оны спортын шилдгүүдийг тодруулах “Бөртэ чоно” ёслол өчигдөр орой боллоо. Уг ёслолд Монгол Улсын Ерөнхийлөгчийн Тамгын газрын дарга П.Цагаан оролцож 2013 оны шилдгийн шилдэг тамирчнаар тодорсон 2013 оны ДАШТ-ний аварга, олон улсын хэмжээний мастер жудоч Мөнхбатын Уранцэцэгт шагналыг нь гардуулж үг хэлсэн юм.
Монгол Улсын Ерөнхийлөгчийн Тамгын газрын дарга П.Цагаан хэлсэн үгэндээ “Энэ сэтгэл догдлуулсан мөчид юуны өмнө энд хуран чуулсан алдар цуутай тамирчид, дасгалжуулагчид, спортод элэгтэй та бүхэнд оройн мэндийг хүргэе. Ирэх 2014 ондоо аз жаргалтай байхын өлзийтэй ерөөлийг дэвшүүлье.
Монголчууд бид тамирчид та бүхнийгээ хараад баярлах, бахархах, омогших сэтгэл төрдөг. Тамирчдаа хараад эв нэгдлийн, эрч хүч, ихийг бүтээх, тэсвэр хатуужлын үлгэр дуурайллыг авч байдаг юм. Тамирчидтай дасгалжуулагчид ямагт хамт байдаг.
Монгол Улсын Ерөнхийлөгч 2040 онд Монголд Олимпын наадмыг зохион байгуулах санаачилга гаргаж энэ нь хүмүүсийн дэмжлэгийг авч байгаа. Ирэх жил бол “Рио 2016” олимпод оноо цуглуулах түүхэн бөгөөд хариуцлагатай жил юм. Тийм учраас тамирчид, дасгалжуулагчид, спортод элэгтэй бүх хүмүүст хандаж нэг зүйлийг захихад та бүхэнд маань эв нэгдэл чухал. Тамирчид, дасгалжуулагчид хоорондоо эцэг хүү шиг, эх охин шиг, төрсөн ах дүүс, төрсөн эгч дүүс шиг бие биеэ ойлгож бэлтгэл сургуулиа амь нэгтэй хийж, уралдаан тэмцээндээ оролцож байгаарай. Гадаадад тэмцээн, уралдаанд оролцож байхдаа тамирчид бие биедээ эх орон нь болж, эх орон нь хажууд нь байгаа юм шиг нөмөр нөөлөгтэй, түшиг тулгууртай явж байгаарай.
Ингэх юм бол сайн сайхан цаг, олимп Монголд ирэх цаг ирнэ. Та бүхэндээ маш их баярлаж байна. Амжилт хүсэн ерөөе. Ингээд”Бөртэ чоно -2013”наадмын тэргүүн дээд шагналын эзнийг нэрлэе. Шилдгийн шилдэг тамирчнаар 1069 оноогоор Мөнхбатын Уранцэцэг жудогийн төрөлд тэргүүллээ ” гэлээ.
Шилдгийн шилдэг тамирчнаар тодорсон жудоч Мөнхбатын Уранцэцэг жудочдын “Хамтын хүч-амжилт” гэсэн уриагаа хэлж энэ өндөр шагнал хүртээсэн та бүхнийхээ итгэлийг алдалгүй амжилт гаргана гэдгээ илэрхийлэв.
Мөнхбатын Уранцэцэг нь “Рио-де-Жанейро-2013” наадмын жудо бөхийн барилдааны насанд хүрэгчдийн ДАШТ-ний аварга болсон юм.
