Өнөөдөр Монгол Улсын Ерөнхийлөгчийн 2010 оны 01 дүгээр сарын 13-ны өдрийн 05 тоот зарлигаар Ардчилсан шинэ Үндсэн хуулийг боловсруулах, улмаар батлалцах, түүнийг хэрэгжүүлэх эрхэм үйлсэд хичээнгүйлэн зүтгэж, улс орныхоо хөгжил дэвшил, ард иргэдийнхээ эрх, эрх чөлөөт байдлыг баталгаажуулах, хууль шударга ёсны нийтлэг зарчмыг бэхжүүлэх үйл хэрэгт оруулсан олон жилийн гавъяа, зүтгэлийг нь өндрөөр үнэлж Монгол төрийн нэрт зүтгэлтэн Бяраагийн Чимидэд Монгол Улсын Хөдөлмөрийн баатар цол хүртээж “Сүхбаатарын одон”, “Алтан соёмбо” тэмдгээр шагналаа.
Мөн Монгол Улсын шинэ Үндсэн хууль батлагдсан өдрийг тохиолдуулан шинэ Үндсэн хууль батлахад болон хэрэгжүүлэхэд оруулсан хувь нэмэр болоод эрхэлсэн ажилдаа олон жил үр бүтээлтэй ажилласан нэр бүхий хүмүүсийг Монгол Улсын одон медалиар шагнав.
Үүнд:
Сүхбаатарын одонгоор Гачуурт хорооны ахмадын зөвлөлийн дарга, АИХ-ын депутат асан Авирмэдийн Далхжав, Сөүл Вин ХХК-ийн зөвлөх инженер, АИХ-ын депутат асан Доржготовын Мандах нарыг, Хөдөлмөрийн Гавъяаны улаан тугийн одонгоор ШУТИС-ын Эрчим хүчний инженерийн их сургуульд багш, АИХ-ын депутат асан Бадарчийн Нүүрэй, Ардчилсан Үндсэн хууль тогтоогчдын холбооны тэргүүн Баярхүүгийн Мижид, АИХ-ын депутат асан, өндөр настан Мандахын Жамсран нарыг, Алтан гадас одонгоор Мобиком корпорацийн ТУЗ-ийн дарга, АИХ-ын депутат асан Цэрэнпунцагийн Болдбаатар, УБ хотын иргэн, АИХ-ын депутат асан Ванчигийн Даваа, Өвөрхангай аймгийн Сант сумын 2-р багийн иргэн, АИХ-ын депутат асан Норовын Дашдондог, Завхан аймгийн ХАА-н биржид мэргэжилтэн Довчинжамцын Лханаажав, Шударга бус өрсөлдөөнийг хянан зохицуулах газрын дарга, АИХ-ын депутат асан Дашдоржийн Мандах, УБЦТС ХК-ийн Сонгинохайрхан дүүрэг дэх салбарын Хэрэглэгчдэд үйлчлэх төвийн хяналтын инженер, АИХ-ын депутат асан Дангаагийн Пүрэвдорж, Улаанбаатар хотын иргэн, өндөр настан, АИХ-ын депутат асан Чулууны Пунцаг, Баянхонгор аймгийн иргэн, АИХ-ын депутат асан Тогоочийн Ширмэн нарыг тус тус шагналаа.
Шагнал гардуулах үеэр Монгол Улсын Ерөнхийлөгч Ц.Элбэгдорж хэлэхдээ, “Одоогоос 18 жилийн өмнө Монгол Улс Ардчилсан Үндсэн хуулиа баталж хүний эрх, эрх чөлөөт байдал, хууль шударга ёсыг дээдэлсэн иргэний хүмүүнлэг нийгэм байгуулахаа дэлхий нийтэд зарласан. Монгол Улсын тэр нэн шинэ, гэгээн түүхийг гардан бүтээлцэж, гарамгай гавъяа байгуулсан хүмүүс бол тэр үеийн Монгол Улсын хууль тогтоох дээд байгууллагын гишүүд-депутатууд юм. Энэ их үйлсийг бүтээлцсэн иргэдийг төлөөлж төрийн дээд шагнал хүртсэн Та бүхэнд чин сэтгэлийн талархал илэрхийлье” гээд Хөдөлмөрийн баатар Б.Чимидэд хандан, “Олон жилийн нөр их хөдөлмөрөө улс орныхоо хууль эрх зүйн салбарын хөгжил дэвшилд зориулан зүтгэж яваа манай төр нийгмийн нэртэй, ахмад зүтгэлтэн, Монгол Улсын шинэ ардчилсан Үндсэн хуулийн эх баригч Монгол Улсын хөдөлмөрийн баатар Бяраагийн Чимэд гуайд төр түмнийхээ нэрийн өмнөөс чин сэтгэлийн гүн талархал илэрхийлье” гэв.
Монгол Улсын Хөдөлмөрийн баатар Б.Чимид шагнал гардаж авсныхаа дараа Үндсэн хууль батлалцсан төрийн зүтгэлтнүүдийн талаар хэлэхдээ, “Эдгээр хүмүүсийн нийтлэг зүйл гэвэл Монгол Улсын өнөөгийн болон өнө удаан амьдралын үндэс болсон Төрийн гол хуулийг нэгэн дуугаар баталсан сод гавьяатай хүмүүс юм. Энэ хуулийн үзэл санааг дэлгэрүүлэхийн төлөө түүний үндэслэл заалтуудыг Төрийн бусад бичиг баримтуудад нарийвчлан тусгаж, түүний тусын тулд үйлчилдэг зөв хуультай, түүнийг хамгаалдаг, хэрэгжүүлдэг, шударга ёсыг тогтоодог, үнэнч шударга шүүхтэй болохын төлөө бид тэмцэх болно” гээд “Хэрвээ би Та бүгдийн санаа сэтгэлийг зөв илэрхийлж чадсан бол өөрийн аз жаргал гэж үзнээ” гэж онцлон хэлэв.
