Монгол Улсын Хөдөлмөрийн баатар Бяраагийн ЧИМИД Үндсэн хууль батлагдсаны 18 жилийн ойн өдөр шагнал гардаж авсныхаа дараа хэлсэн үг
Монгол Улсын Ерөнхийлөгч Ц.Элбэгдорж гуай, Улсын Их Хурлын дарга Д.Дэмбэрэл гуай болон энд байгаа Ерөнхийлөгчийн, мөн Их хурлын тамгын газрын удирдах ажилтан нараа,
Үндсэн хуулийн 18 жилийн ой тохиож буй энэ өдөр өлзийтэй сайхан өдөр юм. Уг хуулийг тогтооход гар бие оролцсон, энд байгаа шагнал хүртсэн нөхдийнхөө өмнөөс юуны өмнө Төрийнхөө тэргүүндээ болон Хууль тогтоох байгууллагын удирдлагад гүн талархал илэрхийлье.
Энд байгаа буурлууд, бас санчиганд нь буурал ороогүй идэрхэн яваа “ахмад” гэж хэлж болох зүтгэлтнүүд маань олон жил хөдөлмөрлөсөн, хөдөлмөрийн үр шимээ одон медалиар үнэлүүлж байна.
Эдгээр хүмүүсийн нэг нийтлэг зүйл гэвэл Монгол Улсын өнөөгийн болон өнө удаан амьдралын үндэс болсон Төрийн гол хуулийг Монгол Улсын өргөн уудам нутаг дээр төрийн ордонд, хаана ч байсан санаа бодлоо оролцуулж нэгэн дуугаар баталсан сод гавьяатай хүмүүс юм.
Тэр үеийн АИХ-ын 420 гаруй депутат одоо амьд сэрүүн байгаа 360 гаруй депутатуудын өмнөөс үнэтэй шагнал хүртсэний хувьд бид үлдэж байгаа хугацаанд хуулийг хэрэгжүүлэхийн төлөө, энэ хуулийн үзэл санааг дэлгэрүүлэхийн төлөө түүний үндэслэл заалтуудыг Төрийн бусад бичиг баримтуудад нарийвчлан тусгаж, түүний тусын тулд үйлчилдэг зөв хуультай, түүнийг хамгаалдаг, хэрэгжүүлдэг, шударга ёсыг тогтоодог, үнэнч шударга шүүхтэй болохын төлөө бид тэмцэх болно.
Хэрвээ би Та бүгдийн санаа сэтгэлийг зөв илэрхийлж чадсан бол өөрийн аз жаргал гэж үзнэ.
Баярлалаа.
