Өнөөдөр Монгол Улсын Үндсэн хууль 22 нас хүрч байна. Ардчилсан хувьсгалын жилүүдэд хуримтлагдсан Монгол түмний язгуур тэмүүлэл, эх орон, үзэл санааныхаа төлөөх тэмцлийн үр дүнд өнөө цагийн Монгол Улсын ололт амжилтын үндэс хууль зүй, улс төрийн баталгаа Монгол Улсын Үндсэн хууль батлагдсан билээ.
Монгол Улсын Үндсэн хуулийг 1992 оны 1 дүгээр сарын 13-ны өдрийн 11 цаг 35 минутад батлан тус оны 2 дугаар сарын 12-ны 12.00 цагаас эхлэн орон даяар дагаж мөрдөж эхэлсэн байдаг. Энэ жилийн Үндсэн хуулийн өдрийг тохиолдуулан Монгол Улсын Ерөнхийлөгчийн албан өрөөнд хүндэтгэн залсан Монгол Улсын Үндсэн Хуулийн эхийг олон түмэнд үзүүлэхээр болсон юм.
Өнөөдөр Монгол Улсын Ерөнхийлөгчийн Тамгын газрын дарга П.Цагаан УИХ-ын Тамгын газрын Ерөнхий нарийн бичгийн дарга Б.Болдбаатар болон, Төрийн Ёслолын албаны дарга Ж.Сэрээжав нарт Монгол Улсын Үндсэн хуулийн эхийг Төрийн түүхийн музейд байрлуулан олон нийтэд сонирхуулахаар хүлээлгэн өгсөн юм.
Монголын ард түмэн мянга мянганаар тоологдох их түүхийн улбаатай, төрийн ёслол хүндэтгэлийн өв их соёлтой ард түмэн. Монгол Улсын Үндсэн хуулийн жинхэнэ эх нь тухайн цаг үеийнхээ тусгал болж, Монгол бичиг болон крил бичгийн машинаар бичиглэгдэн үлдсэн байна. Ийнхүү Монгол Улсын Үндсэн хуулийн жинхэнэ эх цөөн хэдэн өдөр Төрийн түүхийн музейд дэлгэгдэж байна. Эрхэм Та зочлон сонирхоорой.
