Монгол Улсын Ерөнхийлөгч Цахиагийн Элбэгдорж 2010 оны 1 дүгээр сарын 14-нд цаазаар авах ялыг түдгэлзүүлж УИХ-ын чуулганд үг хэлсэнтэй холбогдуулж Монгол Улсын Ерөнхийлөгчийн нэр дээр дэлхийн олон орноос талархлын захидал, мэдэгдлүүд ирсээр байна.
Тухайлбал Европийн Холбооны Дээд төлөөлөгч Катрин Аштон Монгол Улсын Ерөнхийлөгч, УИХ, Засгийн газар, Монголын ард түмэнд баяр хүргэж мэдэгдэл ирүүлжээ.
Тус мэдэгдлийг бүрэн эхээр нь танилцуулж байна.
Европын Холбооны нэрийн өмнөөс Дээд төлөөлөгч Катрин Аштон Монгол Улсад цаазаар авах ялыг түдгэлзүүлэх тухай шийдвэр гарсантай холбогдуулж хийсэн мэдэгдэл
Монгол Улсад 2010 оны 1 сарын 14-нд зарласан хүнийг цаазаар авах ялыг түдгэлзүүлэх шийдвэрийг Европын Холбоо сайшаан хүлээн авч байна. Европын холбоо Монгол Улсын Ерөнхийлөгч, УИХ, Засгийн газар Монголын ард түмэнд энэхүү чухал шийдвэрийг гаргах үйл явцад баяр хүргэж байна.
Европын Холбоо нь Монгол Улсад цаазаар авах ял шийтгэлийг бүрэн хориглож хорих ял шийтгэлээр солихыг уриалж байна. Бид цаазаар авах ялыг халах нь хүний нэр төрийг хамгаалахад үнэтэй хувь нэмэр оруулна хэмээн үздэг юм. Цаазаар авах ялтай байх нь иргэний амьд явах эрхэд заналхийлсэн, хүний эрхэмсэг байдлыг гутаасан зүйл хэмээн тооцогддог бөгөөд цаашлаад засан хүмүүжих боломжийг нь үгүйсгэж, хүний амины үнэлэмжийг алдагдуулдаг билээ.
Монгол Улсад цаазаар авах ялыг түдгэлзүүлсэн нь энэ ялыг бүрэн хориглох чиглэлд хийж байгаа анхны алхам бөгөөд энэ алхмаараа бүс нутагтаа үлгэр дууриал болно гэж Европын Холбоо найдаж байна.
