Өнөөдөр Европын Холбоог төлөөлөн Бүгд Найрамдах Болгар Улсаас Монгол Улсад суугаа ЭСЯ-ны Хэргийг түр хамаарагч ноён К.Колев, Их Британийн Элчин сайд У.Диксон нар Монгол Улсын Ерөнхийлөгч Ц.Элбэгдоржид бараалхаж, цаазаар авах ялыг халах тухай Монгол Улсын Ерөнхийлөгчийн байр суурийг дэмжин ЕХ болон Их Британийн Засгийн газраас гаргасан мэдэгдлүүдийг гардуулав.
1 дүгээр сарын 14-ний Пүрэв гарагт Монгол Улсын Ерөнхийлөгч УИХ-ын чуулганд үг хэлж, цаазаар авах ялыг түдгэлзүүлэх тухай шийдвэр гаргасанаа зарласантай холбогдуулж мөн өдөр Европын Холбооны Дээд Төлөөлөгч хатагтай К.Аштон мэдэгдэл гаргаж, Монгол Улс цаазаар авах ялын бодлогоос түдгэлзсэнийг сайшаагаад, Монголын төр, ард түмэнд баяр хүргэсэн юм. Энэхүү мэдэгдлийн хувийг Түр хамаарагч К.Колев Монгол Улсын Ерөнхийлөгчид өргөн барьж, чухал шийдвэрийг гаргасанд ЕХ-г төлөөлөн баяр хүргэж, Монгол Улсын Ерөнхийлөгчийн шийдвэр нь Монгол Улсын оршин буй бүс нутгийн улсуудад үлгэр дуурайл болох шийдвэр болсныг тэмдэглэлээ. ЕХ-ны дээрх мэдэгдлийг тус холбооны гишүүн 27 улсаас гадна ЕХ-д элсэхээр яриа хэлэлцээ явуулж буй Турк, Хорват, Македон, Албани, Босни–Херцегвина, Серби, Европын чөлөөт худалдааны хэлэлцээрийн гишүүн улсууд болох Лихтенштейн, Исланд, Норвеги улсууд Украйн, Молдов, Армен, Азербайджан, Гүрж зэрэг улсууд мөн дэмжсэн болохыг мэдэгдэлд дурджээ.
Мөн цаазаар авах ялыг халах тухай Монгол Улсын Ерөнхийлөгчийн хийсэн мэдэгдлийг дэмжин Их Британийн Гадаад хэргийн сайд Иван Левисийн гаргасан мэдэгдлийн хувийг Их Британи Улсаас Монгол Улсад суугаа Элчин сайд ноён У.Диксон Монгол Улсын Ерөнхийлөгчид өргөн барив. Их Британйин энэхүү мэдэгдэлд “Монгол Улсын Ерөнхийлөгч Ц.Элбэгдорж цаазаар авах ялыг халах мэдэгдэл гаргаж, мораториум зарласан нь Монгол Улсад хүний эрхийн чиглэлээрх авч хэрэгжүүлж буй онцгой тэмдэглэлт үйл явдал боллоо” хэмээн дурьджээ.
Уг уулзалтын үеэр ноён К.Колев, “Ардчилал бол үйл явц байдаг бөгөөд таны эхлүүлсэн цаазаар авах ялыг халах тухай шийдвэр бол маш чухал үйл явдал боллоо” гэж онцолсон бол ноён У.Диксон, “Их Британи Улс цаазаар авах ялыг хориглох тухайд олон жилийн туршид тууштай байр суурь баримталж байгаагийн хувьд Таны гаргасан санаачилгыг талархан дэмжиж байна гээд Монгол Улсын Ерөнхийлөгчийн энэхүү санаачилга нь Монгол Улсад хүний эрхийн салбарт цаашид дэвшил гарах үүд хаалгыг нээж, хууль, эрх зүйн шинэчлэлийг эрчимжүүлэхэд түлхэц өгнө гэж итгэж байна” гэлээ.
Монгол Улсын Ерөнхийлөгч хэлэхдээ, “Бид цаазаар авах ял оногдуулсан хуулиудыг шинэчлэхийг зорьж байна. Монгол Улсын Засгийн газар, УИХ энэхүү асуудлаар идэвхитэй байр суурь баримтлан хамтран ажиллана гэдэгт итгэлтэй байна. Цаазаар авах ялыг түдгэлзүүлсэн миний шийдвэр бол дээрх асуудлыг шийдэх хаалгыг нь нээж буй хэрэг юм. Цаазаар явах ялыг бүрэн халах хуулийг УИХ магадгүй энэ жилийн хаврын чуулганаараа шийдэж өгөх байх гэж найдаж байна. Бидний байр суурийг дэмжиж байгаа Европын Холбооны гишүүн орнуудад талархаж байна” гэв.
