Киргизийн Ош хотын Хурал /Кенеш/-ын депутатууд Монгол Улсад айлчилж Монголын хөгжлийн туршлагатай танилцаж байна. Улан Примов тэргүүтэй тэдгээр төлөөлөгчдийг өнөөдөр Ерөнхийлөгчийн Тамгын газрын дарга П.Цагаан хүлээн авч уулзсан юм.
Уулзалтын эхэнд Ерөнхийлөгчийн Тамгын газрын дарга П.Цагаанэртнээс найрамдалт харилцаатай нарлаг Киргизийн төлөөлөгчдөд угтан ирж буй Наурызын баярын мэнд хүргэлээ. Төлөөлөгчдийн тэргүүн Улан Примов Монгол-Киргизийн хоорондын харилцаа өнө эртний улбаатай болохыг тэмдэглэж, түүхт хот Ошд айлчлахыг урилаа. Мөн уг уулзалтыг зохион байгуулахад тусалсан АНУ-ын Бүгд найрамдахчуудын хүрээлэнгийн Монгол дахь суурин төлөөлөгчийн газрын ажилтнуудад талархал илэрхийлэв. Киргизийн орон нутгийн хотын Хурлын депутатууд Монгол Улсын ардчилал, зах зээлийн туршлагаас хуваалцахаар ирсэн талаараа танилцуулсан юм. Хамгийн гол нь орон нутгийн Иргэдийн Хурлын үйл ажиллагаа, зохион байгуулалт, шийдвэр хэрхэн гаргадаг талаар судлахаар ирсэн гэдгийг онцоллоо.
Ерөнхийлөгчийн Тамгын газрын дарга П.Цагаан АНУ-ын Бүгд найрамдахчуудын хүрээлэнгийнгийнхэн Монголд ардчилсан хувьсгалын анхны өдрөөс дэмжлэг үзүүлж, ардчиллын цагаан толгойг зааж байсныг тэмдэглэж, Киргиз улс тус хүрээлэнтэй хамтран ажиллаж байгаад баяртай байна гээд ирэх долоо хоногийн эхний өдрүүдэд Улаанбаатарт болох гэж буй Эдийн засгийн тавдугаар форумд төлөөлөгчдийг урив.Урьд нь Киргизийн төлөөлөгчид шүүхийн шинэчлэлийн асуудлаар хийсэн зөвлөгөөн болон Эдийн засгийн өмнөх форумд оролцож Монголын туршлагаас хуваалцаж байсныг мөн дурдсан юм.
Үүний дараа Ерөнхийлөгчийн Тамгын газрын дарга П.Цагаан Киргизийн төлөөлөгчдийг Ерөнхийлөгчийн дэргэдэх Иргэний танхимд урьж үйл ажиллагааны зарчимтай нь танилцууллаа. Монгол Улсын Ерөнхийлөгч Ц.Элбэгдорж 2009 онд эхний удаагийн бүрэн эрхээ хэрэгжүүлж эхэлмэгц өмнө нь Монгол Улсын үе үеийн Ерөнхийлөгч, Ерөнхий сайд нарын ажиллаж байсан албан тасалгааг Иргэний танхим болгож, жирийн иргэд хууль батлахын өмнөх шат болох хуулийн төсөл хэлэлцэх явцад оролцож санал бодлоо илэрхийлэх бололцоогоор хангаж өгснийг дурдсан юм. Хамгийн сүүлд буюу өчигдөр “Монгол Улсын хүртээмжтэй өсөлтийг дэмжих нь” сэдвээр нээлттэй хэлэлцүүлэг хийсэн бол түүний өмнө Шилэн дансны тухай, Зар мэдээний тухай зэрэг хуулийн төслүүдээр хэлэлцүүлэг хийсэн гэлээ. Монгол Улсын Ерөнхийлөгчийн 2013 оны анхны зарлигаар шууд ардчилал-иргэний оролцоог орон даяар өрнүүлж, орон нутгийн иргэд төсвийн зарцуулалтад хяналт тавьж, төсвийн хөрөнгийг юунд зарцуулахыг өөрсдөө шийддэг болсон талаар танилцуулсныг Киргизийн депутатууд сонирхон сонсч байв. Нийслэлийн Засаг даргын буруу хүрдтэй машин явуулахыг хориглосон шийдвэрийг Улаанбаатарын иргэдийн 70 хувь нь эсэргүүцэж, хотын даргын шийдвэр цуцлагдаж байсныг шууд ардчиллын жишээ болгон танилцууллаа. Ерөнхийлөгчийн Тамгын газрын дарга П.Цагаан монголчууд өнгөрсөн 24 жилд ардчиллыг төлөвшүүлэхийн төлөө ажилласан бол одоо шууд ардчилалд иргэдээ суралцуулж байгааг онцлов.
Монголын эдийн засагт хувийн хэвшил давамгайлж, ДНБ-ний 80 хувийг хувийн хэвшлийнхэн гаргаж байгаа, Монгол Улсын Ерөнхийлөгч төрийн өмч оролцсон шинэ компани нэмж байгуулахгүй байх талаар хуулийн төсөл санаачилсан, МҮОНРТ-ээс өөр хувийн хэвлэл, мэдээллийн хэрэгсэл Монголд байхгүй, гадаадын компанийн хөрөнгө оруулалтын хувь хэмжээнд хязгаар тавьж өгсөн байдаг зэрэг олон сэдвийг Киргизийн төлөөлөгчдөд танилцууллаа.
Киргизийн Ош хотын депутатууд Монголын ардчилал, шууд ардчилал-иргэдийн оролцооны талаар ихээхэн зүйл сонсч мэдсэндээ талархал илэрхийлснээр уулзалт өндөрлөлөө.
Мэдээний дүрсийг энд дарж татаж авна уу
