Улаанбаатар хотод хоёр өдөр үргэлжлэх Эдийн засгийн форумын нээлт дээр Монгол Улсын Ерөнхийлөгчийн Тамгын газрын дарга П.Цагаан үг хэллээ.
Тэрээр хэлсэн үгэндээ “Монгол Улсын Ерөнхийлөгч Ц.Элбэгдоржийн идэвхтэй санаачилга, оролцоо, дэмжлэгтэйгээр Монгол Улс, Дэлхийн эдийн засгийн форумын хамтын ажиллагаа сүүлийн дөрвөн жилд идэвхжиж, өргөн олон салбарт хамтран ажиллаж ирлээ. Тухайлбал, усны нөөцийн менежмент, хариуцлагатай уул уурхай, авлигатай тэмцэх зэрэг тодорхой санал санаачлагыг дэмжиж, хамтарч ажиллаж ирсэн. Анхны дугуй ширээний уулзалт, ярилцлагыг 2010 оны зургадугаар сард Улаанбаатар хотод хариуцлагатай уул уурхайн асуудлаар хийж байсан.
Өнгөрсөн хоёр жил шахмын хугацаанд Монгол Улсын Засгийн газар, холбогдох байгууллагууд Дэлхийн эдийн засгийн форумын туршлага бүхий хүмүүстэй хамтран ажиллаж Монголын хөгжлийн хувилбаруудыг боловсруулсан. Өнгөрсөн 2013 оны есдүгээр сард Улаанбаатарт уг асуудлыг хэлэлцэж, энэ 2014 оны нэгдүгээр сард Давосын Дэлхийн эдийн засгийн чуулга уулзалтаар авч хэлэлцсэн юм.
“Монголчууд хүндрэл бэрхшээлээс гадна их мөрөөдөмтгий” гэж сая Ерөнхий сайд Н.Алтанхуяг хэллээ. Монгол Улс өнгөрсөн 24 жилд улс төр, эдийн засгийн хос шилжилтийг амжилттай хийж дэлхийг гайхшруулсан бол ирэх 24 жилд эдийн засгаа жилд байнга хоёр оронтой тоогоор илэрхийлэгдэх хувиар хөгжүүлж, хөгжлийн гайхамшгийг бүтээх бололцоотой юм. Тэгэхдээ макро эдийн засаг, хөрөнгө оруулалтын ухаалаг бодлогыг явуулж чадвал өнөөдрийн хүндрэл, бэрхшээлийг даван туулж чадах бололцоотой гэж үзэж байна.
Ингээд бидэнтэй өнгөрсөн жил гаруйн хугацаанд ойр дотно ажилласан Кристаллыг Монголын хөгжлийн хувилбаруудын тухай салбар хуралдааныг хөтөлж, эдгээр хувилбаруудыг Эдийн засгийн чуулганд оролцогчдод танилцуулахыг урьж байна. Баярлалаа” гэлээ.
