Монгол Улсын Ерөнхийлөгчийн Тамгын газрын санаачлагаар EBI хүрээлэнгээс зохион байгуулсан Мьянмарын сэтгүүлчдийн уулзалт-сургалт өнөөдөр өндөрлөв. Мьянмарын холбооны улсын хамгийн нөлөө бүхий хэвлэл, мэдээлийн хэрэгслүүдийг төлөөлсөн 20 сэтгүүлч уг арга хэмжээнд хамрагдсан юм.
Сургалтын сүүлийн өдөр Мьянмарын сэтгүүлчдэд Монгол Улсын Ерөнхийлөгчийн Хүний эрх, хуулийн бодлогын зөвлөх Ч.Өнөрбаяр Монголд өрнөж буй хууль, шүүхийн салбарын шинэтгэл, хуулийн засаглалын талаар лекц уншлаа. Өмнөх нийгмийн үед нам, төрд үйлчилсэн, хатуу зарчимтай хүчний байгууллага байсан хууль, шүүхийн салбарыг өдгөө иргэдэд үйлчилдэг үйлчилгээний байгууллага болгон өөрчлөн шинэчилж байгаа талаар тэрээр лекцдээ танилцуулсан юм. Монгол Улсын Ерөнхийлөгч Ц.Элбэгдоржийн санаачлагаар хийж буй шүүхийн шинэтгэлийн хүрээнд УИХ-аас шинээр хуулиуд баталж, шүүхийн үйл ажиллагаа, шүүх хурлын процесс иргэдэд нээлттэй болсон, шүүх хуралд иргэний төлөөллөөр оролцсон хүмүүсийн саналыг шүүх хурлын шийдвэрт харгалзан үздэг болсон, төрийн албан хаагчид хөрөнгө оруулгын мэдүүлгээ АТГ-т тогтмол өгдөг болсон зэргийг Мьянмарын сэтгүүлчид сонирхон сонсч, асуул тавьж хариулт авч байсан юм.
Сүүлийн жилүүдэд “Transparency International” байгууллагын судалгаагаар Монгол Улс авлигын индексээрээ олон байраар урагшилж, авлига хурдтай буурч буй орны тоонд зүй ёсоор багтах болсныг Ерөнхийлөгчийн зөвлөх Ч.Өнөрбаяр мөн тэмдэглэж байлаа. Тэрээр сэтгүүлчдэд “хүний засаглал”, “хуулиар засаглах”, “хуулийн засаглал” гэсэн ойлголтуудын ялгааг тайлбарлаж, Монголд хуулийн засаглалыг бэхжүүлэх үйл явц үргэлжилж байгааг хэллээ.
Мьянмарын сэтгүүлчид Монгол Улсын Батлан хамгаалах яам ямар үүрэгтэй байдаг, дайны болоод онц байдал зарласан үед улс оронд ямар зарчим үйлчлэх учиртайг тодруулж байв. Ерөнхийлөгчийн зөвлөх Ч.Өнөрбаяр үүнд хариулахдаа “Дайны үед ч, онц байдал зарласан нөхцөлд ч, энгийн үед ч бүх зүйл зөвхөн хууль, журмын хүрээнд зохицуулагдах ёстой. Батлан хамгаалах яам зөвхөн улс орныг батлан хамгаалах чиглэлийн бодлого боловсруулах үүрэгтэй. Түүнээс биш төр, улсын хэрэгт цэрэг, арми оролцдоггүй. Зэвсэгт хүчнийг Жанжин штаб гэдэг мэргэжлийн байгууллага удирддаг. Монгол Улс алива асуудлыг цэрэг, зэвсгээр бус, оюун ухаан, зөвшилцлөөр шийдэхийг эрхэмлэдэг. Монгол, Мьянмар хоёр нь хоёулаа Азийн орнууд, аль аль нь ардчилал, хүний эрхийн төлөө явж байгаа орнууд гэдгээрээ адил төстэй” гээд сэтгүүлчдэд амжилт хүсэн ерөөлөө.
