Монгол Улсын Ерөнхийлөгч Ц.Элбэгдорж УИХ-ын чуулганд цаазаар авах ялыг халах тухай үг хэлж, тус ялыг түдгэлзүүлсэн талаар мэдэгдэл гаргасантай нь холбогдуулж дэлхийн олон орноос баяр хүргэсэн захидал болон тус шийдвэрийг дэмжсэн мэдэгдлүүд ирсээр байна.
Өнөөдөр Монгол Улс дахь ХБНГУ-ын ЭСЯ-ны Хэргийг түр хамаарагч доктор Михаэль Фройденберг, БНФУ-ын ЭСЯ-ны Хэргийг түр хамаарагч ноён Жан Пьер Балло нар тус тусын Засгийн газруудаас ирүүлсэн мэдэгдлүүдийг Монгол Улсын Ерөнхийлөгчийн зөвлөхүүдэд гардууллаа.
Уулзалтын үеэр доктор М.Фройденберг хэлэхдээ, “Монгол Улсын Ерөнхийлөгч маш үндэслэл сайтай шийдвэр гаргалаа. Цаазаар авах ялыг түдгэлзүүлэх нь маш эмзэг шийдэл бөгөөд Европын холбоо, тэр дундаа ХБНГУ нь Монгол Улстай энэхүү эмзэг асуудал дээр ижил байр суурьтай хамтран ажиллах болсондоо таатай байна. Манай улс 1949 онд Үндсэн хуулиа батлахдаа энэ ялыг бүрмөсөн халсан юм. Монгол Улс ч бас энэ замыг тууштай баримталж амжилтанд хүрнэ гэдэгт итгэж байна” гэлээ.
Мөн Францын ЭСЯ-ны Хэргийг түр хамаарагч ноён Ж.Балло хэлэхдээ, “Манай Улсад 1981 онд тус ялыг Ерөнхийлөгч Миттеран халсан. Тухайн үед хүн амын бараг гуравны хоёр нь тус ялыг халах бодлогыг эсэргүүцэж байсан хүнд үед маш алсын хараатай шийдвэр гаргасан нь өнөө үед манай улсын бахархал болдог юм” гэв.
Уулзалтын төгсгөлд Монгол Улсын Ерөнхийлөгчийн зөвлөх П.Цагаан, Ц.Оюунгэрэл нар Ерөнхийлөгчийн байр суурийг дэмжиж буй тус улсуудад талархал илэрхийлэв.
