Монгол улсын Ерөнхийлөгч Ц.Элбэгдорж өнөөдөр, манай улсад айлчилж байгаа ОХУ-ын Воронеж мужийн амбан захирагч, Монгол улстай хийх худалдаа, эдийн засгийн болон хөрөнгө оруулалтын хамтын ажиллагааг хариуцсан ОХУ-ын Ерөнхийлөгчийн тусгай төлөөлөгч А.В.Гордеевийг хүлээн авч уулзлаа.
Ноён А.В.Гордеев, Оросын Засгийн газар Монгол улстай эдийн засаг, худалдааны харилцааг өргөтгөх сонирхолтой байгаа гэдгээ дахин нотлоод, тэр дундаа, төмөр зам, уран, банкны салбарт хөрөнгө оруулж, хамтран ажиллахад бэлэн байгаа гэлээ. Хамтарсан хөрөнгө оруулалттай үйлдвэрүүдийн асуудлаар Монголын тал шийдвэр гаргахдаа, харилцан ярилцаж, зөвшилцөнө гэдэгт итгэж байна гэж тэрээр мөн хэлсэн юм.
Ерөнхийлөгч Ц.Элбэгдорж, ОХУ-тай тогтоосон сайн хөршийн найрсаг харилцаанд онцгой ач холбогдол өгч байгаагаа илэрхийлээд, өнгөрсөн 2009 он бидний харилцаа, хамтын ажиллагааны хувьд онцгой жил байлаа гэдгийг дурсав. ОХУ-ын Ерөнхийлөгч болон Засгийн газрын Тэргүүн нарын манай улсад хийсэн айлчлалын үеэр хийсэн гэрээнүүд, яриа тохироог үр дүнтэй ажил хэрэг болгохын төлөө хоёр талын Засгийн газрын зүгээс хүчин чармайлт гаргаж ажиллаж байгааг мөн Ерөнхийлөгч сайшаалаа.
Ирэх хавар, Монгол Улсын Ерөнхийлөгч ОХУ-д айлчлах төлөвлөгөөтэй байгаа. Энэ айлчлал нь ёслолын төдий бус, хоёр орны эдийн засгийн хамтын ажиллагааг урагшлуулсан, бодит асуудал шийдвэрлэсэн, үр дүнтэй айлчлал болох ёстой гэдэгтэй уулзалтанд оролцогсод санал нэг байлаа.
Монгол, Орос хоёр орны хооронд бараа эргэлтийн хэмжээ буурч байгаа тул хоёр талын худалдааг либеральчлах ажлыг үргэлжлүүлэх мөн махны экспортын асуудал чухал хэвээр байгаа талаар ч мөн энэ үеэр ярилцав.
Ноён А.В.Гордеев нь, Монгол Оросын худалдаа, эдийн засаг, шинжлэх ухаан, техникийн хамтын ажиллагааны Засгийн газар хоорондын комиссын оросын хэсгийн даргаар ажиллаж байхдаа хоёр орны харилцааг шинэ агуулгаар баяжуулахад үнэтэй хувь нэмрээ оруулж байсан юм.
