Монгол Улсын Ерөнхийлөгчийн зарлигаар ОХУ-ын Холбооны Аюулгүй байдлын алба/ХАБА/-ны Бүгд Найрамдах Буриад улсын Хиагт хот дахь албыг Цэргийн гавьяаны одонгоор шагнасан юм. Ерөнхийлөгчийн Тамгын газрын дарга П.Цагаан наймдугаар сарын 8-нд Хиагт хотноо хүрэлцэн очиж уг шагналыг гардууллаа. Холбооны Аюулгүй байдлын албаны Хиагт дахь албаны бие бүрэлдэхүүн Монгол Улсын Ерөнхийлөгчийн Тамгын газрын дарга П.Цагаан, Хил Хамгаалах Ерөнхий газрын дарга, бригадын генерал Ш.Лхачинжав болон Монголын талын албаны бусад хүмүүсийг халуун дотноор угтан авав.
Угтан авсан хүмүүсийн дунд ОХУ-ын Бүгд Найрамдах Буриад Улсын Засгийн газрын тэргүүн В.В Наговицын, Буриадын Ардын Хурлын дарга М.М.Гершевич, ОХУ-ын ХАБА-ны Буриад Улсын Хилийн удирдах газрын дарга, хошууч генерал И.В.Бондарев, ОХУ-аас Монгол Улсад суугаа Онц бөгөөд Бүрэн эрхт Элчин сайдын зөвлөх И.Н.Аржаев, ОХУ-аас Монгол Улсын Дархан хотод суугаа Ерөнхий консул А.Ц.Доржиев, ОХУ-ын ХАБА-ны байгууллагуудын Монгол дахь албан ёсны төлөөлөгч, хурандаа Г.В.Соленков тэргүүтэй төлөөлөгчид байлцлаа.
Одон гардуулах ёслолын үеэр Ерөнхийлөгчийн Тамгын газрын дарга П.Цагаан хэлсэн үгэндээ
“Эрхэм хүндэт ОХУ-ын Бүгд Найрамдах Буриад Улсын Засгийн газрын тэргүүн Вячеслав Владимирович Наговицын,
Эрхэм хүндэт дайчид, хилчид ээ,
Хүндэт нөхөд өө,
Хатагтай, ноёд оо,
Монгол Улсын Ерөнхийлөгч, Зэвсэгт хүчний ерөнхий командлагч Цахиагийн Элбэгдоржийн зарлигийн дагуу ОХУ-ын Бүгд Найрамдах Буриад улс дахь ОХУ-ын Холбооны Аюулгүй байдлын албаны Хиагтын албанд Цэргийн гавьяаны одон гардуулах хүндтэй бөгөөд хариуцлагатай үүргийг биелүүлэхээр бид энд хуран цуглаад байна.
Энэхүү тэмдэглэлт үйл явдлыг тохиолдуулан хилчид та бүхэнд чин сэтгэлийн баяр хүргэе. Энэ хүндтэй шагнал нь хилчид, ОХУ-ын зэвсэгт хүчин хоёр орны хил хамгаалах, хамтын ажиллагааг хөгжүүлэх үйлсэд оруулсан хүндтэй гавьяаг илэрхийлж байгаа юм.
Халхын голд ялалт байгуулсны түүхэн 75 жилийн ойн босгон дээр, ОХУ-ын Ерөнхийлөгч Владимир Путины Монголд хийх албан ёсны айлчлалын өмнөхөн энэхүү одонг гардуулж байгаадаа таатай байна. ОХУ-ын төрийн тэргүүний айлчлал манай хоёр орны найрамдалт харилцаа, бүх талын хамтын ажиллагааг шинэ шатанд хүргэх нь дамжиггүй.
Ерөнхийлөгч Ц.Элбэгдоржийн хэлснээр Оросын ард түмэн нь монголчуудын төлөө, Монголын тусгаар тогтнол, эрх чөлөөний төлөө цусаа урсгасан ард түмэн юм. Халхын голын дайн үүнийг дэлхийд харуулсан. Хиагтын хилчид энэхүү дайнд тулалдаж явсныг дуулахад сайхан санагдаж байлаа. Монголын ард түмэн үүнийг хэзээ ч мартахгүй. Ахмад дайчид та бүхэнд гүнээ талархал илэрхийлье.
Халхын голын дайнд ЗХУ-ын Эх орны дайны цуут жанжин, маршал Георгий Константинович Жуковын цэргийн удирдагчийн авъяас билэг тодорсон билээ.
Өнөөдрийн энэ тэмдэглэлт үйл явдал Хиагтад болж байгаа нь тохиолдлын хэрэг биш юм. Монголын XX зууны түүх энд эхэлж, Ардын хувьсгалыг эхлүүлэгчид 1921 онд энд цугларч байсан.
Монгол, Орос бол үүрдийн хөршүүд. Манай хоёр улсыг залгах торгон хил дэлхийн хамгийн амгалан тайван хил. Энэ бол бидний найрсаг харилцааны үнэт зүйлсийн нэг билээ. Монголчууд "Нуур амгалан бол нугас амгалан" гэдэг шиг, "Хил амгалан бол улс амгалан".
Сайн хөршийн хэлхээ холбоог хөгжүүлэхэд хил орчмын бүс нутгийн харилцаа, хилчдийн хамтын ажиллагаа хамгаас чухал юм. Бид энэ харилцааг хөгжүүлэхийн төлөө ажиллахад бэлэн байна.
Монгол Улсын Ерөнхийлөгчийн нэрийн өмнөөс болон хувиасаа та бүхэнд дахин баяр хүргэж, улсынхаа хилийг хамгаалан, хоёр орны найрсаг харилцааг хөгжүүлж буй энэ сайхан үйлсэд тань амжилт хүсэн ерөөе.
Баярлалаа” гэв.
Үүний дараа ОХУ-ын Бүгд Найрамдах Буриад улс дахь Холбооны Аюулгүй байдлын албаны Хиагтын албыг шагнасан Монгол Улсын Ерөнхийлөгчийн зарлигийг уншин сонордуулж одонг гардууллаа. Монгол Улсын Ерөнхийлөгчийн 90 дугаар тоот зарлигт “Тулгар төрийн 2223 жил, Их Монгол Улс байгуулагдсаны 808 жил, Үндэсний их баяр наадам, Ардын хувьсгалын 93 жил, Халх голын дайны ялалтын 75 жилийн ойг тус тус тохиолдуулан ОХУ-ын Бүгд Найрамдах Буриад Улс дахь Холбооны Аюулгүй байдлын албаны Хиагтын албыг Цэргийн гавьяаны одонгоор шагнасугай” хэмээжээ.
ОХУ-ын Буриадын Засгийн газрын тэргүүн В.В.Наговицын хэлсэн үгэндээ “Энэхүү шагнал нь зөвхөн манай хилчдийн хувьд төдийгүй хоёр орны харилцаанд түүхэн чухал үйл явдал боллоо. ОХУ-ын Бүгд Найрамдах Буриад улс дахь Холбооны Аюулгүй байдлын албаны Хиагтын албаны хувьд түүхэнд анх удаа гадаадын улс орноос ийм хүндтэй одонг гардан авч байгаад талархаж байна” гэлээ. Түүх сөхвөл Хиагт хотыг Орос, Монголын найрамдлыг бэхжүүлэхэд онцгой хувь нэмэр оруулсных нь төлөө 1973 онд Монгол Улсын төрийн дээд шагнал Сүхбаатарын одонгоор шагнаж, тус хот гадаадын төрийн дээд шагнал хүртсэн дэлхийн анхны хот болж байжээ.
Арга хэмжээний үеэр хилчид болон орон нутгийн удирдлагын төлөөлөл хэлсэн үгэндээ хоёр орон дайны хүнд бэрх жилүүдэд харилцан бие биедээ тусалж, түүхийн шалгарлыг даван туулсаар ирснийг дурдаж байв. Тухайлбал, Халхын голын дайнд ЗХУ-ын талаас 50 гаруй мянган цэрэг илгээсний 16 мянга нь буриад цэргүүд байсан, мөн Дэлхийн II дайны үед монголчууд 500 мянган агт морь, их хэмжээний хувцас, хэрэгсэл ЗХУ-д илгээж байсныг дурсацгаалаа. Түүнчлэн дайны дараах жилүүдэд ЗХУ нь Монгол Улсын бүтээн байгуулалт, боловсрол, хөдөө аж ахуй зэрэг бүхий л салбарыг хөгжүүлэхэд асар их хувь нэмэр оруулсныг бидний хойч үе мартах ёсгүй гэдгийг Монгол Улсын Ерөнхийлөгчийн Тамгын газрын дарга П.Цагаан онцолж байлаа. Хиагтын хилчид хөрш орнуудыг хөндийрүүлэн тусгаарлах бус, харин хоёр орны ард иргэдийн эв нэгдлийг улам бүр батжуулж ирснийг хилийн цэргийн удирдлагууд сайшаав.
Одон гардуулах ёслолын дараа Монгол Улсын Ерөнхийлөгчийн Тамгын газрын дарга П.Цагаан сэтгүүлчдийн асуултад хариуллаа. Сэтгүүлчид уг арга хэмжээг хоёр талын харилцаанд чухал ач холбогдолтой, хоёр орны хилчдийн урам зоригийг бадраасан үйл явдал болж буйг дурдаад ОХУ-ын Ерөнхийлөгч В.Путины Монголд хийх айлчлалын үеэр Монгол Улс, ОХУ-ын хооронд визгүй зорчих гэрээ хэлэлцээр байгуулах эсэх талаар асуув. Ерөнхийлөгчийн Тамгын газрын дарга П.Цагаан ОХУ-ын Ерөнхийлөгч В.Путины айлчлалын үеэр хоёр орны харилцааг шинэ шатанд гаргах олон чухал асуудлыг шийднэ гэдэгт найдаж буйгаа илэрхийллээ.
Мэдээний том зургуудыг дорх линкээр татаж авна уу.
http://share.gogo.mn/ifOGrSujCC97651407674690/xiagt zyrg.rar
