БНСУ-д айлчилж байгаа Ромын Пап Фрэнсис тус улс руу зорчих замдаа А2А 4000 дугаартай агаарын хөлгөөр Монгол Улсын нутаг дээгүүр өнгөрч явахдаа Монгол Улсын Ерөнхийлөгч Ц.Элбэгдоржийг хүндэтгэн цахилгаан утас илгээжээ.
Тэрбээр өөрийн гараар бичсэн цахилгаан утсандаа “Монгол Улсын нутаг дээгүүр нисэх онгоцоор явж байна. Монгол Улсын Ерөнхийлөгч Ц.Элбэгдорж болон Монголын ард түмэнд хамгийн сайн сайхан бүхнийг хүсэн ерөөн адислаж байгааг минь хүлээн авна уу. Монголын ард түмний энх тунх байдал, хөгжил дэвшлийн төлөө залбиръя. Фрэнсис Пап 2014 оны 08 сарын 13-ны 21 цаг 29 секунд” гэжээ.
Ромын Пап Фрэнсис БНСУ-д тав хоног айлчилж буй нь 2013 оны гуравдугаар сард Пап болсноосоо хойш Азид хийсэн анхны айлчлал нь болсон юм. Тэрээр БНСУ-д айлчлах хугацаандаа залуусын фестивальд оролцсоноос гадна Солонгосын хойгт энх тайван тогтоохыг уриалжээ.
