Өнөөдөр Монгол Улсын Ерөнхийлөгч Ц.Элбэгдорж 2008 оноос эхлэн тэмдэглэж байхаар тогтсон “Иргэний нийгмийн өдөр”-ийг тохиолдуулан иргэний нийгмийн байгууллагын төлөөлөл болон иргэдтэйгээ уулзаж тэдэнд тулгамдаж буй зарим асуудлын талаар санал солилцлоо.
Тус уулзалтанд Нээлттэй Нийгэм Форум, Хүний эрх Хөгжил төв, Хүчирхийллийн эсрэг Үндэсний төв, Иргэдийн Альянс төв, Монголын Ахмадын Чөлөөт Холбоо, Улс төрийн боловсролын академи, Монголын Эмэгтэйчүүдийн Холбоо, Монголын Хэвлэлийн Хүрээлэн, Байгаль Орчны Иргэний Зөвлөл, Хүн ам, НҮЭМ-ийн ТББ-ын сүлжээ, Эмнести Интернэшнл Монгол ТББ, МОНФЭМНЭТ зэрэг ТББ-уудын төлөөлөл оролцлоо.
Уулзалтыг нээж Ерөнхийлөгч Ц.Элбэгдорж хэлэхдээ, “Бидний Үндсэн хуулиараа цогцлоон байгуулахыг тунхагласан иргэний нийгмийн үндэс нь иргэний нийгмийн байгууллагууд бус иргэдийн идэвхитэй, бодитой оролцоо юм. Тэрхүү оролцоог нийгмийн хэвшил болгож энэ тал дээр их зүйл хийх хэрэгтэй” хэмээн онцолсон юм.
Уулзалтанд оролцогчид өөр өөрсдийн үйл ажиллагааны чиглэлээр тэдэнд тулгамдаж буй асуудлуудын талаар байр сууриа илэрхийллээ. Тухайлбал, иргэний нийгмийн тогтвортой хөгжлийг хангах бодлогыг хэрхэн тодорхойлж болох тухай, байгаль орчны хор хохирлыг зөв зүйтэй шийдвэрлэхийн тулд байгаль орчны шүүх байгуулах тухай, төрийн байгууллагуудаар бус иргэний нийгмийн байгууллага, эрдэмтдийн зөвлөмжөөр тайлан мэдээ гаргаж байх тухай, Хүний эрхийн үндэсний механизмыг бэхжүүлэх талаар хийх ажлууд, үүний тулд Парисын зарчимд нийцсэн хуультай болох, ТББ-уудын хуулийг шинэчлэх, жендерийн тэгш бус байдлыг хангах, эмэгтэйчүүдийн улс төрийн эрхийг хангах талаар эрх зүйн орчинг боловсронгуй болгох болон нийтийн эрх ашгийг хамгаалах стратегийн өмгөөлөлийн эрх зүйн орчин бүрдүүлэх асуудал гэх зэрэг сэдвээр нээлттэй ярилцлага өрнүүлж санал солилцлоо.
Монголын Эмнести Интернэшнл байгууллагыг төлөөлж Р.Янжмаа, Монгол Улсын Ерөнхийлөгч цаазаар авах ялын эсрэг мораториум зарласанд талархаад энэ асуудал дээр ТББ-ууд дэмжиж байгааг хэллээ.
Уулзалтын төгсгөлд, Монгол Улсын Ерөнхийлөгч Ц.Элбэгдорж, цааш цаашдаа иргэний нийгмийн байгууллагуудыг чиглэл чиглэлээр нь ангилж байнгын уулзалт ярилцлага зохион байгуулж байх нь зүйтэй гээд иргэдэд, ялангуяа орон нутагт очоогүй эрх бол “эрх” болж чадахгүй байна. Төрийн зарим үүргийг ТББ, иргэний нийгмийн байгууллагуудад шилжүүлэх тал дээр бид анхаарах ёстой гэв.
