Монгол Улсад айлчилж байгаа БНСУ-ын Гадаад хэргийн сайд Юн Бён Сэ өнөөдөр Монгол Улсын Ерөнхийлөгч Ц.Элбэгдоржид бараалхав.
Уулзалтын эхэнд Монгол Улсын Ерөнхийлөгч Ц.Элбэгдорж БНСУ-ын Гадаад хэргийн сайдын айлчлалд амжилт хүсч хоёр орны харилцаа бүх салбарт амжилттай хөгжиж буйг тэмдэглэв. Монгол Улс, БНСУ-ын хооронд дипломат харилцаа тогтоосноос хойш 24 жил өнгөрч буй бөгөөд ирэх 2015 онд тэмдэглэх 25 жилийн ойн хүрээнд хоёр талаас хийх ажлууд багагүй байгааг БНСУ-ын Гадаад хэргийн сайд Юн Бён Сэ хэлээд Монголд ардчилал амжилттай хөгжиж эдийн засаг хурдацтай хөгжиж байгаад чин сэтгэлээсээ баяртай байдгаа илэрхийллээ.
Мөн уг ойг тохиолдуулан Монгол Улсын Ерөнхийлөгчийг БНСУ-д төрийн айлчлал хийхийг урилаа. Уг урилгыг Монгол Улсын Ерөнхийлөгч талархан хүлээж аваад аливаа айлчлалын эдийн засгийн утга агуулга нэн чухал гэдгийг тэмдэглэж байв.
Бүс нутагт энх тайван, аюулгүй байдлыг тогтооход Монгол Улсын Ерөнхийлөгчийн гаргасан Зүүн хойд Азийн аюулгүй байдлын асуудлаарх “Улаанбаатарын яриа хэлэлцээ” санаачилга чухал ач холбогдолтой гэдгийг БНСУ-ын Гадаад хэргийн сайд онцлов. Мөн үүнтэй ойролцоо Зүүн хойд Азийн цөмийн аюулгүй байдлын хамтын ажиллагааны байгууллага байгуулах тухай санаачлагыг БНСУ-ын Ерөнхийлөгч хатагтай Пак Гын Хэ энэ наймдугаар сарын 15-нд гаргасан байна. Үүнд Монгол Улс оролцож болох юм хэмээн БНСУ-ын Ерөнхийлөгч хэлжээ. Монгол Улсын цөмийн зэвсэггүй статусыг НҮБ-ын Аюулгүйн зөвлөлийн байнгын гишүүн орнууд санал нэгтэй дэмжиж гарын үсэг зурсан нь бүс нутгийн аюулгүй байдалд чухал ач холбогдолтой жишиг болох зүйл болсон гэдгийг Монгол Улсын Ерөнхийлөгч Ц.Элбэгдорж онцоллоо. Үүний зэрэгцээ цөмийн хаягдлыг Монгол Улсын газар нутагт булшлах, Монголын нутгаар тээвэрлэх тухай ямар ч асуудал байхгүй гэдгийг дахин илэрхийлэв.
Мөн Монгол Улсын иргэдийг БНСУ-д визгүй зорчуулах боломжийн тухай сэдвийг хөндөн ярилцлаа.
Монгол Улсын Ерөнхийлөгч Ц.Элбэгдорж уулзалтын төгсгөлд БНСУ-ын Ерөнхийлөгч Пак Гын Хэ-д чин сэтгэлийн халуун мэндчилгээ дэвшүүллээ.
Мэдээний том зургийг татаж авах линк
http://share.gogo.mn/gJURARagal93701409042140/Solongos 2014_08_26.rar
