Төсөл
МОНГОЛ УЛСЫН ХУУЛЬ
2014 оны ... дугаар сарын ... -ны өдөр Улаанбаатар хот
ХҮҮХЭД ХАРАХ ҮЙЛЧИЛГЭЭНИЙ ТУХАЙ
НЭГДҮГЭЭР БҮЛЭГ
Нийтлэг үндэслэл
1 дүгээр зүйл. Хуулийн зорилт
1.1. Энэ хуулийн зорилт нь эрүүл, аюулгүй орчинд хүүхэд харах үйлчилгээг зохион байгуулахтай холбогдсон харилцааг зохицуулахад оршино.
2 дугаар зүйл. Хүүхэд харах үйлчилгээний тухай хууль тогтоомж
2.1. Хүүхэд харах үйлчилгээний тухай хууль тогтоомж нь Монгол Улсын Үндсэн хууль, энэ хууль, Хүүхдийн эрхийг хамгаалах тухай хууль, Аж ахуйн үйл ажиллагааны тусгай зөвшөөрлийн тухай хууль, Ариун цэврийн тухай хууль, Хүнсний тухай хууль, Хүнсний бүтээгдэхүүний аюулгүй байдлыг хангах тухай хууль болон тэдгээртэй нийцүүлэн гаргасан хууль тогтоомж бусад актаас бүрдэнэ.
2.2. Олон улсын гэрээнд энэ хуульд зааснаас өөрөөр заасан бол олон улсын гэрээний заалтыг дагаж мөрдөнө.
3 дугаар зүйл. Хуулийн нэр томъёо
3.1. Энэ хуульд хэрэглэсэн нэр томъёог дараах утгаар ойлгоно.
3.1.1. "Хүүхэд харах үйлчилгээ" гэдэгт энэхүү хуулийн 5 дугаар зүйлийн 5.1 дэх хэсэгт заасан насны хүүхдийг эрүүл, аюулгүй орчинд асран халамжлах, хамгаалах, хооллох, тоглуулах, амраах, хөгжүүлэх цогц үйл ажиллагааг;
3.1.2. “Хүүхэд харах төв” гэдэгт эрх бүхий байгууллагаас хүүхэд харах үйлчилгээг зохион байгуулах тусгай зөвшөөрөл авсан хуулийн этгээдийг;
3.1.3. “Хүүхэд харах ажилтан” гэдэгт хүүхэд харах төвд хүүхэдтэй шууд харьцан ажиллаж буй хүнийг;
3.1.4. "Ажилтан" гэдэгт хүүхэд харах төвд ажиллаж буй хүнийг;
3.1.4. "Байр" гэдэгт хүн амьдрах хэвийн нөхцлийг хангасан бүх төрлийн орон сууц, байшин барилга, өрөө, танхимыг;
3.1.5. "Гэр" гэдэгт эсгий гэрийг;
4 дүгээр зүйл. Хүүхэд харах үйлчилгээнд баримтлах зарчим
4.1. Хүүхдийн амь нас, эрүүл мэндэд эрсдэлгүй байна.
4.2. Хүүхдийн бие бялдар, оюун ухаан, сэтгэхүй, харилцаа, зан суртахууны хөгжил, төлөвшил, хүмүүжилд сөрөг нөлөөлөл, үр дагаваргүй байна.
4.3. Эцэг эх, асран хамгаалагч, хүүхдийн эрх ашиг, сонирхолд нийцсэн байна.
4.4. Үйлчилгээний зохион байгуулалт нь хүүхэд харах төв, эцэг эх, асран хамгаалагчийн харилцан зөвшилцөл, хамтын хариуцлагын үндсэн дээр нээлттэй, уян хатан байна.
4.5. Хүүхэд харах төв нь эцэг эх, асран хамгаалагчийн хяналтын дор ажиллана.
ХОЁРДУГААР БҮЛЭГ
Хүүхэд харах үйлчилгээнд тавигдах шаардлага
5 дугаар зүйл. Хүүхэд харах үйлчилгээнд хамрагдагчид
5.1. Хүүхэд харах үйлчилгээнд 2 наснаас ерөнхий боловсролын сургуульд элсэх хүртэлх насны хүүхэд хамрагдана.
6 дугаар зүйл. Хүүхэд харах үйлчилгээнд тавигдах нийтлэг шаардлага
6.1. Хүүхэд харах үйлчилгээг энэхүү хуулийн 13 дугаар зүйлийн 13.1 дэх хэсэгт заасан үүсгэн байгуулагчийн өөрийн өмчлөлийн байр, түрээсийн байр, зээлийн байр, гэрт зохион байгуулж болно.
6.2. Хүүхэд харах үйлчилгээг зохион байгуулах байр, гэр, гадна орчин нь дараах нөхцөл, шаардлагыг хангасан байна:
6.2.1. Байр, гэр, гадна орчин нь хүүхдийн амь нас, эрүүл мэндэд эрсдэлгүй, хүүхэд аливаа болзошгүй сөрөг нөлөөлөл, үйлдлээс
хамгаалагдсан хэвийн нөхцлийг бүрдүүлсэн байна.
6.2.2. Хүүхэд харах үйлчилгээний байр, гэрийг зөвхөн хүүхэд харах
үйлчилгээний зориулалтаар ашиглана.
6.2.3. Байр, гэрийн дотор, гадна орчинг бүрэн хэмжээгээр хянах боломжтой байхаар камержуулж, бичлэг хийдэг тоног төхөөрөмжөөр тоноглосон байна.
6.2.4. Байр нь хүүхэд амрах, тоглох, гар угаах, бие засах газар, гал тогоотой байна.
6.2.5. Гэрт зохион байгуулах тохиолдолд гал тогооны тусдаа гэртэй байна.
6.2.6. Гадаа бие засах газар ашиглах тохиолдолд хүүхдэд осол, гэмтэлгүй байх, эрүүл ахуй, ариун цэврийн хэвийн нөхцлийг хангасан байна.
6.2.7. Байр, гэрийн халаалт, гэрэлтүүлэг, агааржуулалт нь амьдралын
хэвийн нөхцлийг хангасан байна.
6.2.8. Гэрт зохион байгуулах тохиолдолд зууханд хүүхэд ойртохгүй байхаар
тусгаарлах хаалтыг хийсэн байна.
6.3. Хүүхэд харах төвийн нэг хүүхдэд ногдох ашигтай талбай 2 м.кв-аас доошгүй байна.
6.4. Хүүхэд харах төв нь хүүхдийг асран халамжлах, хамгаалах, хооллох, тоглуулах, амраах, хөгжүүлэх үйл ажиллагааг хэрэгжүүлэхэд шаардлагатай тоног төхөөрөмж, тавилга, хэрэгсэлтэй байна.
6.5. Хүүхэд харах ажилтан нь бүрэн дунд болон түүнээс дээш боловсролтой, халдварт болон сэтгэцийн өвчингүй, эрүүл, гэмт хэрэгт холбогдож байгаагүй, 20-иос 60 насны иргэн байна.
6.6. Хүүхэд харах төв нь хүүхдийг асран халамжлах, хамгаалах, хооллох, тоглуулах, амраах, хөгжүүлэх үйл ажиллагааг хэвийн хэмжээнд зохион байгуулахад хүрэлцэхүйц тооны ажилтантай байна.
6.7. Хүүхэд харах нэг төвд хамрагдах хүүхдийн тооны дээд хязгаар нь 20-иос илүүгүй байна.
ГУРАВДУГААР БҮЛЭГ
Хүүхэд харах үйлчилгээний зохион байгуулалт, санхүүжилт
7 дугаар зүйл. Хүүхэд харах үйлчилгээний зохион байгуулалт
7.1. Хүүхэд харах төвийн ажиллах цагийн хуваарь нь хүүхдийн эцэг эх, асран хамгаалагчийн ажлын цаг, үйлчлүүлэх хэрэгцээнд нийцсэн нээлттэй, уян хатан байна.
7.2. Хүүхэд харах төвийн ажиллах цагийн хуваарийг эцэг эх, асран хамгаалагч, хүүхэд харах төв харилцан зөвшилцөж тогтооно.
7.3. Хүүхэд харах төвийн ажлын цаг нь өдөрт 12 цагаас илүүгүй байна.
7.4. Хүүхэд харах төв нь өглөө, өдөр 2 удаагийн халуун хоол, үдийн өмнөх, үдийн хойшхи 2 удаагийн цайны үйлчилгээтэй байна.
7.5. Хүүхэд харах төвийн хүүхдийн хоолны үндсэн шимт бодис, илчлэгийн хэмжээ, хоолны орц нь төрийн өмчийн 8 цагийн өдрийн цэцэрлэгийнхтэй адил байна.
7.6. Хүүхэд харах төв нь эцэг эх, асран хамгаалагчтай харилцан зөвшилцөж баталсан өдрийн дэглэм, хоолны цэсийг мөрдөж ажиллана.
7.7. Хүүхэд харах төв нь хүүхдийн ирцийг тогтмол бүртгэж ажиллана.
8 дугаар зүйл. Хүүхэд харах үйлчилгээнд хориглох зүйл
8.1. Ямар ч нөхцөл, тохиолдолд хүүхдийг харах хүнгүй, хараа хяналтгүй орхихыг хориглоно.
8.2. Хүн, айл амьдарч байгаа өрхийн орон сууц, гэр, байшинд хүүхэд харах үйлчилгээг зохион байгуулахыг хориглоно.
8.3. Хүүхэд харах төвийн байр, гэрт хүүхэд харах үйлчилгээнээс бусад аливаа үйлчилгээ, үйл ажиллагаа явуулахыг хориглоно.
8.4. Хүүхдэд нойрсуулах болон тайвшруулах эм бэлдмэл уулгахыг хориглоно.
8.5. Хүүхдийг цахим хэрэгслээр тоглуулахыг хориглоно.
8.6. Хүүхдэд телевизор, компьютерийг нэг өдөрт 30 минутаас илүү хугацаагаар үзүүлэхийг хориглоно.
8.7. Хүүхэд харах төвд шашны зан үйл, үйл ажиллагаа явуулахыг хориглоно.
8.8. Хүүхэд харах төвийн байр, гэрт эрх бүхий этгээдээс өөр бусад гадны хүн нэвтрэхийг хориглоно.
8.9. Хүүхэд харах төвийн хяналтын камерыг ажиллуулахгүй байх, бичлэг хийхгүй байх, бичлэгийг устгахыг хориглоно.
8.10. Хүүхэд харах төвд хамрагдаагүй хүүхдэд санхүүжилт авахыг хориглоно.
8.11. Хүүхэд харах төвийн ажилтнууд хүүхдэд бие махбодийн болон сэтгэл санааны хүчирхийлэл, дарамт, шахалт үзүүлэх, хүүхэд болон эцэг эх, асран хамгаалагчтай бүдүүлэг, үг хэллэгээр харилцах болон хүүхдийн дэргэд зүй бус авир, үйлдэл гаргах, бусадтай хэрэлдэх, бүдүүлэг үг хэллэг хэрэглэн харилцахыг хориглоно.
9 дүгээр зүйл. Хүүхэд харах үйлчилгээний санхүүжилт
9.1. Хүүхэд харах үйлчилгээнд хамрагдаж байгаа хүүхдийн хоолны зардал, нэг хүүхдэд ногдох нормативт зардлыг улсын төсвөөс санхүүжүүлэх бөгөөд төрийн өмчийн цэцэрлэгт олгож буй зардалтай адил байна.
9.2. Хүүхэд харах төв нь хүүхдийн эцэг эх, асран хамгаалагчтай зөвшилцсөний үндсэн дээр төлбөр авч болно.
9.3. Хүүхэд харах төв нь иргэн, аж ахуйн нэгж, байгууллагаас хандив, тусламж авч болно.
ДӨРӨВДҮГЭЭР БҮЛЭГ
Хүүхэд харах үйлчилгээний удирдлага
10 дугаар зүйл. Төрийн захиргааны төв байгууллагын эрх, үүрэг
10.1. Хүүхэд харах үйлчилгээний талаарх бодлого, төлөвлөлт, санхүүжилт, удирдлага, мэдээлэл, хяналт-шинжилгээ, зохицуулалтыг улсын хэмжээнд Хүн амын хөгжил, нийгмийн хамгааллын асуудал эрхэлсэн төрийн захиргааны төв байгууллага хариуцан хэрэгжүүлнэ.
10.2. Хүүхэд харах үйлчилгээний
10.3. Хүүхэд харах төвийг үүсгэн байгуулахад бүрдүүлэх материалд тавигдах шаардлага, хүүхэд харах үйлчилгээг зохион байгуулахтай холбоотой журмыг Хүн амын хөгжил, нийгмийн хамгааллын асуудал эрхэлсэн Засгийн газрын гишүүн батлан хэрэгжүүлнэ.
ТАВДУГААР БҮЛЭГ
Хүүхэд харах үйлчилгээнд оролцогчдын эрх
11 дүгээр зүйл. Эцэг эх, асран хамгаалагчийн эрх, үүрэг
11.1. Эрх бүхий байгууллагаас зөвшөөрөл авсан эсэхэд хяналт тавина.
11.2. Хүүхдийн амь нас, эрүүл мэндэд эрсдэлгүй байх нөхцлийн хангалтад байнгын хяналт тавина.
11.3. Хүүхдийн хоол, хүнсний аюулгүй байдал, үйлчилгээний чанарт байнгын хяналт тавина.
11.4. Харилцан зөвшилцсөн төлбөрийг төлнө.
11.5. Хүүхдэд шаардлагатай ариун цэврийн болон бусад хэрэглэгдэхүүнийг хариуцан гаргана.
11.5. Үйлчилгээтэй холбоотой аливаа санал, гомдлыг эрх бүхий байгууллагад гаргаж болно.
11.6. Хүүхдээ эрүүл мэндийн үзлэгт тогтмол хамруулж, товлосон хугацаанд дархлаажуулалт хийлгэнэ.
12 дугаар зүйл. Хүүхэд харах төвийн эрх, үүрэг
12.1. Хүүхэд төвд байх хугацаанд тэдний амь нас, эрүүл мэнд эрсдэлгүй байх, аливаа болзошгүй сөрөг нөлөөлөл, үйлдлээс хүүхдийг хамгаалах асуудлыг бүрэн хариуцна.
12.2. Санхүүгийн бүртгэл, тайланг холбогдох хууль, тогтоомжийн дагуу хийж гүйцэтгэнэ.
12.3. Хүүхэд харах төв нь хоол, хүнсний аюулгүй байдал, ариун цэвэр, эрүүл ахуйн холбогдох хууль тогтоомжийг мөрдөж ажиллана.
12.4. Хүүхэд харах төвийн ажилтнуудыг эрүүл мэндийн үзлэг, шинжилгээнд тогтмол хамруулна.
12.5. Шаардлагатай статистикийн болон санхүүгийн тайлан, мэдээг холбогдох байгууллагуудад тогтоосон хугацаанд гаргаж өгнө.
12.6. Эцэг эх, асран хамгаалагчид төвийн үйл ажиллагааг байнга нээлттэй байлгаж, тэдэнд хяналт тавих нөхцлийг бүрдүүлнэ.
12.7. Эцэг эх, асран хамгаалагчтай гэрээ байгуулж ажиллана.
12.8. Эцэг эх, асран хамгаалагчид энэхүү хуулийн 12 дугаар зүйлийн 12.7 дахь хэсэгт заасан гэрээний үүргийн хэрэгжилт болон төлбөр, санхүүжилтийн зарцуулалтын тайланг танилцуулна.
ЗУРГААДУГААР БҮЛЭГ
Хүүхэд харах үйлчилгээ эрхлэх тусгай зөвшөөрөл олгох,
түдгэлзүүлэх, хүчингүй болгох
13 дугаар зүйл. Хүүхэд харах үйлчилгээ эрхлэх тусгай зөвшөөрөл олгох, түдгэлзүүлэх, хүчингүй болох
13.1. Хүүхэд харах үйлчилгээг зохион байгуулах хүүхэд харах төвийг иргэн, аж ахуйн нэгж, байгууллага үүсгэн байгуулна.
13.2. Энэхүү хуулийн 13 дугаар зүйлийн 13.1 дэх хэсэгт заасан байгууллага гэдэгт төрийн өмчийн цэцэрлэг хамаарахгүй.
13.3. Хүүхэд харах үйлчилгээ эрхлэх тусгай зөвшөөрлийг аймаг, нийслэлийн хүүхэд, гэр бүлийн хөгжлийн асуудал эрхэлсэн төрийн захиргааны байгууллага олгоно.
13.4. Хүүхэд харах үйлчилгээ эрхлэх тусгай зөвшөөрөл хүссэн өргөдөл, холбогдох бусад баримт бичгийг хянан үзэж, тусгай зөвшөөрөл олгох эсэх тухай асуудлыг 14 хоногийн дотор шийдвэрлэнэ.
13.5. Энэхүү хуулийн 5-8 дугаар зүйл, 9 дүгээр зүйлийн 9.2 дахь хэсэг, 12 дугаар зүйлийг зөрчсөн нь эрх бүхий байгууллагын дүгнэлтээр тогтоогдвол тусгай зөвшөөрлийг хүчингүй болноно.
13.6. Энэхүү хуулийн 13 дугаар бүлгийн 13.5 дахь хэсэгт зааснаас бусад үндэслэлээр Хүүхэд харах үйлчилгээ эрхлэх тусгай зөвшөөрлийг, түдгэлзүүлэх, хүчингүй болох харилцааг Аж ахуйн үйл ажиллагааны тусгай зөвшөөрлийн тухай хууль, тогтоомжоор зохицуулна.
14 дүгээр зүйл. Тусгай зөвшөөрөл авахад бүрдүүлэх баримт бичиг
14.1. Тусгай зөвшөөрөл авахад энэхүү хуулийн 6 дугаар зүйлийн 6.1, 6.2, 6.4, 6.5 дахь хэсэгт заасан нөхцөл, шаардлагыг хангасныг нотлох материал болон Аж ахуйн үйл ажиллагааны тусгай зөвшөөрлийн тухай хуульд заасан баримт бичгийг бүрдүүлнэ.
ДОЛООДУГААР БҮЛЭГ
Хүүхэд харах үйлчилгээний хяналт
15 дугаар зүйл. Хүүхэд харах үйлчилгээнд тавих хяналт
15.1. Хүүхэд харах үйлчилгээний байнгын хяналтыг эцэг, эх, асран хамгаалагч хэрэгжүүлнэ.
15.2. Энэхүү хуулийн хэрэгжилтэд Мэргэжлийн хяналтын байгууллага, улсын байцаагч хяналт тавина.
НАЙМДУГААР БҮЛЭГ
Бусад зүйл
16 дугаар зүйл. Хууль тогтоомж зөрчигчид хүлээлгэх хариуцлага
16.1. Хүүхэд харах үйлчилгээний тухай хууль тогтоомж зөрчигчид дараах хариуцлага хүлээлгэнэ.
16.1.1.Хүүхэд харах үйлчилгээний тухай хууль тогтоомж зөрчсөн тохиолдолд үйлчилгээ эрхлэх тусгай зөвшөөрлийг дахин сэргээх эрхгүйгээр хүчингүй болгоно.
16.1.2. Энэхүү хуулийг зөрчсөн нь эрх бүхий байгууллага, хуулийн этгээдээр тогтоогдвол буруутай этгээдэд холбогдох хууль тогтоомжийн дагуу хариуцлага хүлээлгэнэ.
17 дугаар зүйл. Хууль хүчин төгөлдөр болох
17.1. Энэ хуулийг 2015 оны 1 дүгээр сарын 1-ний өдрөөс эхлэн мөрдөнө.
МОНГОЛ УЛСЫН ИХ ХУРЛЫН ДАРГА З.ЭНХБОЛД
Төсөл
МОНГОЛ УЛСЫН ХУУЛЬ
2014 оны ... дугаар Улаанбаатар
сарын ... -ны өдөр хот
АЖ АХУЙН ҮЙЛ АЖИЛЛАГААНЫ ТУСГАЙ
ЗӨВШӨӨРЛИЙН ТУХАЙ ХУУЛЬД
НЭМЭЛТ, ӨӨРЧЛӨЛТ ОРУУЛАХ ТУХАЙ ХУУЛЬ
1 дүгээр зүйл. Аж ахуйн үйл ажиллагааны тусгай зөвшөөрлийн тухай хуулийн 15 дугаар зүйл, 16 дугаар зүйлд дор дурдсан агуулгатай дараах хэсэг, заалтыг тус тус нэмсүгэй:
1/ 15 дугаар зүйлийн 15.9.2 дахь заалт:
“15.9.2. Хүүхэд харах үйлчилгээ эрхлэх;”
2/ 16 дугаар зүйлийн 16.4 дэх хэсэг:
"16.4. Дараахь аж ахуйн үйл ажиллагаа эрхлэхэд аймаг, нийслэлийн хүүхэд, гэр бүлийн хөгжлийн асуудал эрхэлсэн төрийн захиргааны байгууллагаас тусгай зөвшөөрөл олгоно:"
3/ 16 дугаар зүйлийн 16.4.1 дэх заалт:
"16.4.1. Хүүхэд харах үйлчилгээ эрхлэх"
4/ 16 дугаар зүйлийн 16.2.8 дахь заалт:
"16.2.8. Хүүхэд харах үйлчилгээ эрхлэх"
2 дугаар зүйл. Аж ахуйн үйл ажиллагааны тусгай зөвшөөрлийн тухай хуулийн "16 дугаар зүйл. Аймаг, нийслэл, сум, дүүргийн Засаг дарга, мэргэжлийн хяналтын байгууллагаас зөвшөөрөл олгох аж ахуйн үйл ажиллагааны төрөл" гэснийг "16 дугаар зүйл. Аймаг, нийслэл, сум, дүүргийн Засаг дарга, мэргэжлийн хяналтын байгууллага, аймаг, нийслэлийн хүүхэд, гэр бүлийн хөгжлийн асуудал эрхэлсэн төрийн захиргааны байгууллагаас зөвшөөрөл олгох аж ахуйн үйл ажиллагааны төрөл" гэж өөрчлөн найруулсугай.
3 дугаар зүйл. Энэ хуулийг Хүүхэд харах үйлчилгээний тухай хууль хүчин төгөлдөр болсон өдрөөс эхлэн дагаж мөрдөнө.
МОНГОЛ УЛСЫН ИХ ХУРЛЫН ДАРГА З.ЭНХБОЛД
