Өнөөдөр Монгол Улсын Ерөнхийлөгч Цахиагийн Элбэгдорж Монголын Соёл Яруу Найргийн Академиас зохион байгуулж буй “Г.Мэнд-Ооёогийн уран бүтээлийн хишиг өдрүүд-Утгын болор сүм” нэртэй уран бичлэг, бичиг соёлын үзэсгэлэнгийн нээлтэнд оролцов.
Яруу найрагч Г.Мэнд-Ооёо яруу найраг, хүүрнэл зохиол, бодрол бясалгал, нийтлэл судалгааны 30 гаруй ном хэвлүүлсэн бөгөөд долоо хоногийн турш үргэлжлэх үзэсгэлэнгийн нээлтэнд Монголын утга зохиол, урлаг соёлын салбарт нэр төртэй олон зочид төлөөлөгчид, уншигчид хүрэлцэн ирсэн байв.
Монгол Улсын Ерөнхийлөгч уг үзэсгэлэнг нээж буй Г.Мэнд-Ооёод хандаж хэлсэн үгэндээ, “Мэнд-Ооёо бол Монголын яруу найргийг дэлхийн түвшинд хүртэл хөтлөж яваа эрдэмтэн хүн” хэмээгээд Монголын өв соёл, түүх шашдир, уламжлал баян хэл соёлыг олон улсад сурталчилж байгаад нь талархал илэрхийлсэн юм.
АНУ-ын Калифорни муж улсад бүртгэлтэй Дэлхийн Урлаг соёлын Академи, түүний ивээл дор зохион явуулдаг Дэлхийн яруу найргийн их хурал 1969 оноос эхлэн “поэт лауреат” цомыг алтан титмийн хамт олгодог болсон бөгөөд дэлхийн яруу найргийн ертөнцөд өндөр хүндлэл, дээд жишиг болсон энэхүү шагналыг Монголоос анх удаа яруу найрагч Г.Мэнд-Ооёо 2009 онд хүртсэн байна.
