Монгол Улсын Ерөнхийлөгч Ц.Элбэгдорж НҮБ-ын Ерөнхий нарийн бичгийн дарга Бан Ги Мүнтэй нэгдүгээр сарын 27-ны өдөр утсаар ярьж, уур амьсгалын өөрчлөлт, Монгол Улсад тохиолдож буй өвөлжилтийн хүндрэл, Гаитид болсон газар хөдлөлт болон бусад асуудлаар харилцан санал солилцлоо.
Монгол Улсад энэ өвөл олон жилийн дунджаас илүү хүйтэрч, цас ихээр унаж өвөлжилтийн байдал хүндэрч, улмаар 1 сая гаруй мал хорогдоод буйг Монгол Улсын Ерөнхийлөгч мэдээлж, хөдөөгийн малчин олон өрх амжиргааны эх үүсвэрээ алдаж, улмаар НҮБ-аас зарласан Мянганы хөгжлийн зорилтуудыг хангах хүрээнд Монгол Улсад ядуурлыг бууруулах чиглэлээр авч хэрэгжүүлж буй ажилд сөргөөр нөлөөлөхөд хүрээд байгааг дурдлаа. Цаашид малчдын эрүүл мэндийг хамгаалах, тэднийг малжуулах, ялангуяа Монгол Улсад хөдөөгийн шинэ бодлого боловсруулан хэрэгжүүлэхэд НҮБ-ын зүгээс анхаарлаа хандуулж, хамтран ажиллахыг Ерөнхийлөгч Ц.Элбэгдорж НҮБ-ын Ерөнхий нарийн бичгийн даргад уламжлав.
Ерөнхийлөгч Ц.Элбэгдорж мөн Гаитид хүчтэй газар хөдөлж, олон хүний эрдэнэт амь, түүний дотор НҮБ-ын ажилтнууд амь эрсдсэнд Монголын ард түмэн, төр засгийн зүгээс эмгэнэл илэрхийлж, Монгол Улс боломжийнхоо хүрээнд тусламж дэмжлэг үзүүлэхээр шийдвэрлээд буйг мэдээллээ. Гаитид эмх замбараагүй явдал даамжирахаас сэргийлэх, улмаар сэргээн босгоход НҮБ онцгой чухал үүрэгтэйг Ерөнхийлөгч Ц.Элбэгдорж тэмдэглэж, энэ чиглэлээрх НҮБ-ын үйл ажиллагааг Монгол Улс тууштай дэмжихээ илэрхийллээ.
Монгол Улс НҮБ-ын үйл ажиллагааг идэвхтэй дэмжин хамтран ажиллаж байгаад НҮБ-ын Ерөнхий нарийн бичгийн дарга талархаад, уур амьсгалын өөрчлөлтийн асуудлаар Монгол Улсын Ерөнхийлөгч идэвхтэй байр суурь баримтлан, Копенгагены уулзалтын үеэр санаачилгатай ажилласныг сайшааж, энэ чиглэлээр цаашид ойр дотно хамтран ажиллах сонирхолтойгоо илэрхийлэв. Үүнтэй холбогдуулан Копенгагены уулзалтын төгсгөлийн баримт бичиг болох “Копенгагений тохиролцоо”-нд Монгол Улс удахгүй нэгдэн орж, уур амьсгалын өөрчлөлтийн эсрэг авч хэрэгжүүлэх арга хэмжээнийхээ жагсаалтыг хугацаанд нь гаргаж өгнө хэмээн найдаж байгаагаа НҮБ-ын ЕНБДарга илэрхийлэв.
Ноён Бан Ги Мүн мөн цаазаар авах ялд хориг тавьсан Ерөнхийлөгч Ц.Элбэгдоржийн шийдвэрт баяр хүргэж, улмаар уг ялыг бүрэн халахыг дэмжиж байгаа илэрхийллээ. Тэрээр мөн НҮБ-ын Мянганы хөгжлийн зорилтуудыг хэрэгжүүлэх, түүний дотор ядууралтай тэмцэх асуудлаар Монгол Улсын Ерөнхийлөгчтэй цаашид үр дүнтэй хамтран ажиллахаа илэрхийлж, энэ оны есдүгээр сард Нью-Йорк хотноо болох Мянганы хөгжлийн зорилтын хэрэгжилтийг хянах НҮБ-ын дээд хэмжээний уулзалтыг амжилттай болгохын төлөө хамтран ажиллахыг санал болгов.
НҮБ-ын Ерөнхий нарийн бичгийн дарга ноён Бан Ги Мүн 2009 оны зун Монгол Улсад айлчилсан бөгөөд мөн 2009 оны 12 дугаар сард Копенгаген хотноо болсон уур амьсгалын өөрчлөлтийн асуудлаарх НҮБ-ын бага хурлын үеэр Ерөнхийлөгч Ц.Элбэгдоржтой уулзаж ярилцаж байсан юм. Ерөнхийлөгч Ц.Элбэгдорж, НҮБ-ын Ерөнхий нарийн бичгийн дарга Бан Ги Мүн нар Харвардын их сургуулийн төгсөгчдийн холбооны хүрээнд мөн ойр дотно хамтран ажилладаг байна.
