Монгол Улсын Ерөнхийлөгч Ц.Элбэгдорж өнөөдөр Давосын чуулга уулзалтыг зорихоосоо өмнө дэлхийн нэрт эдийн засагч, хүн төрөлхтний түүхэнд дэх шилдэг эдийн засагчдын жагсаалтын тав дугаарт жагсдаг ноён Эрнандо де Сототой утсаар ярив.
“Капиталын нууц”, “Өөр зам” зэрэг дэлхийд алдартай бэстсэллэр номын зохиогч тэрбээр ирэх сарын 6-10-ны өдрүүдэд Монгол Улсын Ерөнхийлөгчийн урилгаар манай улсад ажиллаж Монголын эдийн засгийн нөхцөл байдалд дүн шинжилгээ хийж “Эдийн засгийн амжилтын учиг ” нэртэй лекцээ олон нийтэд хүргэх юм. Тэрээр энэхүү лекцээрээ Монгол Улсын эдийн засгийг хэрхэн хөгжүүлэх асуудлаар өөрийн байр сууриа дэвшүүлэх бөгөөд түүний шинжээчдийн баг манай улсад ажиллаж эхлээд байгаа юм.
Ерөнхийлөгч утсаар ярихдаа, “Таныг манай улсад морилон ирэх гэж буйд баяртай байна. Мөн таны илгээсэн судалгааны баг өвлийн ид хүйтнээр манай улсад идэвхи зүтгэлтэйгээр ажиллаж байгаад нэн талархаж байна. Миний бие Давосын олон улсын чуулга уулзалтыг зорьж буй бөгөөд тун удахгүй Монгол Улсад баяртай уулзъя” гэлээ.
