Монгол Улсын Ерөнхийлөгчийн хот, хөдөөгийн бодлогын зөвлөх Л.Эрхэмбаяр Соросын сангийн гүйцэтгэх захирал П.Эрдэнэжаргал, эдийн засгийн бодлогын асуудал хариуцсан менежер Б.Мөнхсоёл нартай орон нутгийн удирдлагыг бэхжүүлэх болон төсвийн төвлөрлийг бууруулах асуудлаар уулзаж санал бодлоо солилцлоо.
Тус форум энэ асуудлын хүрээнд төв, орон нутгийн засаг захиргааны байгууллагууд хоорондын чиг үүрэг, санхүүжилтын хуваарилалтыг оновчтой болгох эрх зүйн шинэтгэл хийхэд шаардлагатай бэлтгэл ажил, орон нутаг болон улс төрчид, судлаачдын чадавхийг дээшлүүлэхээр хэрэгжүүлсэн хөтөлбөрийнхөө үр дүнгийн талаар танилцууллаа.
Ерөнхийлөгчийн Зөвлөх 2009-2013 он хүртэл хэрэгжүүлэх Ерөнхийлөгчийн бодлого, үйл ажиллагааны хөтөлбөр батлагдан гарсан тухай хэлээд, мөн сонгуулийн мөрийн хөтөлбөрт ч “хуулиар булаан авсан эрхийг орон нутагт буцаан олгоно” гэсэн амлалтыг ажил хэрэг болгохоор ажиллаж эхлээд байгаагаа танилцууллаа.
Мөн хэт төвлөрсөн эрх мэдлийг бууруулах, орон нутгийн удирдлагыг бэхжүүлэх, мөн бэлчээрийн тухай хуулин дээр судалгаа, шинжилгээ хийж хамтран ажиллахыг хүссэн юм.
Соросын сангийн гүйцэтгэх захирал П.Эрдэнэжаргал бэлчээрийн тухай асуудлаар санал солилцохдоо: “Манай байгууллага одоогоор энэ чиглэлээр ажилласан зүйл байхгүй байгаа, НҮБ, Дэлхийн банк энэ талаар нэлээд судалгаа хийсэн гэсэн мэдээлэл байгаа” гээд орон нутгийн удирдлагыг бэхжүүлэх, төсвийн төвлөрлийг бууруулах талаар хамтран ажиллахад бэлэн байна гэдгээ илэрхийлсэн юм.
