Ерөнхийлөгчийн хот, хөдөөгийн хөгжлийн бодлогын зөвлөх Л.Эрхэмбаяр Монголын Мянган сорилтын сангийн Ерөнхий зөвлөх Х.Оюунцэцэг, Хот орчмын бэлчээрийн төслийн захирал Б.Алтанцэцэг нарыг хүлээн авч уулзлаа. Эхлээд Мянганы сорилын сангийн төлөөлөгчид тус сангаас Монгол Улсад хэрэгжүүлж байгаа болон хэрэгжүүлэхээр боловсруулагдаж байгаа төслүүдийн талаар товч танилцуулга хийв.
Зөвлөх Л.Эрхэмбаяр тус сангийн зүгээс малыг эрүүлжүүлэх төслийг хэрэгжүүлэх гэж байгааг дэмжээд Монгол орны мал, махны экспортын тулгамдсан асуудлын талаар мэдээлэл өгч, малчдыг бэлэн мөнгөний хомсдолоос гаргах, тэдний амьжиргааг дээшлүүлэх, тус улсын эдийн засагт чухал түлхэц болох асуудлын нэг бол экспортын баримжаатай малыг эрүүлжүүлэх бодлого гэж онцоллоо.
Энэ талаар тодорхой судалгаа, шинжилгээний ажил хийсэн тухайгаа мөн дурдсан бөгөөд зөвхөн малыг эрүүлжүүлэх бус мөн махны кондецын асуудлуудыг хамтад нь цогцоор шийдвэрлэж байж үр дүнд хүрнэ гэдгийг анхаарууллаа.
Мөн хотын хүн амыг эрүүл, баталгаатай хүнсээр хангахад сүүний фирмийн аж ахуйн асуудлыг зүй зохистойгоор шийдвэрлэх хэрэгтэй бөгөөд үхрийн тэжээл, тугал бойжуулах, өсвөр үхрийн сүргийн маллагаа, үржлийн үйл явц, техник технологи, сүү нөөцлөх асуудлуудыг цогцоор нь шийдвэрлэхгүйгээр сүүний фермийн аж ахуй цаашид дорвитой үр дүнд хүрэхгүйг онцолсон юм. Талууд дээрх асуудлуудаар хамтран ажиллахыг хүссэнээр уулзалт өндөрлөлөө.
