Дизайн паркын нээлтэд ороцогсдод
Монгол түмэн эртнээс уран тансаг хийц, утга агуулгын хувьд гүнзгий урлагийн бүтээлүүдээр алдартай. Тал нутгийн нүүдэлчид алт, мөнгө, зэс болон бусад үнэт чулууг ашиглан хүмүүний нүд сэтгэлийг баясгах бүтээл болгох урлагийг төгс эзэмшсэн байсны нэгэн жишээ нь Өндөр Гэгээн Занабазарын уран бүтээлүүд билээ.
Өдөр тутмын ахуйн хэрэглээнд ч мод, чулууг ашиглан хүүхдийн танин мэдэхүйг тэлж, гоо сайхны мэдрэмжийг нь хөгжүүлэх төрөл бүрийн тоглоом наадгайг урлаж ирсэн уламжлалтай ард түмэн билээ бид.
Олон нийтэд соёл урлагийн цогц үйлчилгээг дээд зэрэглэлээр үзүүлэх энэхүү төвийн үйл ажиллагааг худалдаа бизнестэй нягт уялдуулан хөгжүүлэх үүднээс Монголын мэргэжлийн уран бүтээлчид болох архитектор, зураач, барималч, зохион бүтээгчид, соёл урлаг судлаачид үндэсний үйлдвэрлэгчидтэй хамтран байгуулж, өнөөдөр энэ сайхан уламжлалыг залгуулж авч явах залуу үеийн уран бүтээлчдийг дэмжих бойжуулах төв нээгдэж буйд туйлын баяртай байна.
Та бүхний ажилд амжилт хүсье.
Монгол түмний оюуны хүч шавхагдашгүй, заяа буян нь өөдрөг байх болтугай!
Монгол Улсын Ерөнхийлөгчийн
Хөгжлийн эдийн засаг, хөдөлмөр
эрхлэлтийн бодлогын зөвлөх
Ч.Отгочулуу
