Эрхэм хүндэт Ерөнхийлөгчөө,
Хүндэт зочид оо,
Бидний урилгыг хүлээн авч хүрэлцэн ирсэнд талархалаа илэрхийлье.
Манай Тамгын газрын хамт олон Ерөнхийлөгчөөс өгсөн чиглэлийн дагуу энэхүү Иргэний танхимыг ажиллуулж эхлэх бэлтгэлийг бүрэн хангаж өнөөдрийн энэхүү ёслолоор үйл ажиллагаагаа эхлэж байна.
Иргэний танхим шаардлагатай техник хэрэгсэл, тоног төхөөрөмжөөр бүрэн хангагдсан бөгөөд нөгөө талаас үйл ажиллагаа явуулах дүрэм журам нь батлагдаж танхимын үйл ажиллагаа эхлэхэд бэлэн боллоо. Иргэний танхимын үйл ажиллагаа явуулах дүрэм журам манай веб сайтад тавигдаж, сонин хэвлэлүүдэд хэвлэгдэж гарсан бөгөөд энэхүү танхимыг ажиллуулах хүмүүс ч шинэ дүрэм журмаа судалж, техник хэрэгсэлтэйгээ танилцаж, үйл ажиллагаагаа эрхлэн явуулахад бэлэн болоод байгаа юм.
Иргэний тэнхимын үйл ажиллагаа явуулахад материаллаг болоод техникийн туслалцаа үзүүлсэн, Германы Техникийн хамтын ажиллагааны нийгэмлэг, Азийн сан, Нээлттэй нийгэм форум, Төр засгийн үйлчилгээ, аж ахуйг эрхлэх газрын хамт олонд гүн талархалаа илэрхийлье.
Та бүхний дэмжлэг туслалцаа байгаагүй бол бид өнөөдөр энэхүү Иргэний тэнхимын үйл ажиллагааг эхлүүлэх боломжгүй байсан. Та бүхний энэхүү дэмжлэг Монголын төрийн ардчиллыг гүнзгийрүүлэх, ард түмнийг төрийн хууль батлан гаргах хэлэлцүүлэгт өргөнөөр оролцуулах, чанартай хууль тогтоомжууд гаргахад тус дэм болох нь дамжиггүй.
Та бүхэнд баярлалаа.
Иргэний танхим өнөөдрөөс эхлэн үйл ажиллагаагаа эхэлж байгааг мэдэгдэе.
